മലയാളത്തിന്റെ പവർഹൗസ് എന്ന് വിശേഷിപ്പിക്കുന്ന ഒരു നടനെ ഉള്ളൂ, സുരേഷ് ഗോപി. കമ്മീഷണറും ആനക്കാട്ടിൽ ചാക്കോച്ചിയും കുട്ടപ്പായിയും മുഹമ്മദ് സർക്കാരും പോലുള്ള കഥാപാത്രങ്ങൾ മലയാളികൾക്ക് മറക്കാൻ കഴിയില്ല. കരുത്തുറ്റ കഥാപാത്രങ്ങൾക്ക് ഒരു മുഖമുണ്ടേൽ അതാണ് സുരേഷ് ഗോപി. വളരെ അപൂർവ്വം ചില സിനിമകളിൽ മാത്രമാണ് അദ്ദേഹം ഹാസ്യം ചെയ്തിട്ടുള്ളത്. അതിൽ മിന്നൽ പ്രതാപൻ എന്ന കഥാപാത്രം ഇന്നും ആഘോഷിക്കപ്പെടുന്നു. എന്നാൽ അച്ഛൻ കോമഡി സിനിമകൾ ചെയ്യുന്നത് തനിക്ക് ഇഷ്ടമല്ലെന്ന് പറയുകയാണ് മകൻ ഗോകുൽ സുരേഷ്. ഗഗനചാരി എന്ന സിനിമയുടെ പ്രമോഷന്റെ ഭാഗമായി ഒരു ഓൺലൈൻ മാധ്യമത്തോട് സംസാരിക്കുകയായിരുന്നു താരം.
“കോമഡി പോര എന്നതിന്റെ പേരിൽ അച്ഛനെ കുറെ ആൾക്കാർ വിമർശിക്കും. അച്ഛന്റെ ചില സിനിമകൾ എനിക്കും ഇഷ്ടമല്ല. അച്ഛൻ അങ്ങനെ കോമഡി ചെയ്യേണ്ട. എനിക്ക് അങ്ങനെ തോന്നിയിട്ടുണ്ട്. അച്ഛന്റെ ശാരീരിക പ്രകൃതത്തിനും ഇമേജിനും സക്സസ് ഫുൾ ആയിട്ടുള്ള ഒരുപാട് റോളുകൾ ഉണ്ടല്ലോ, അതായിരിക്കും ചേരുക”-ഗോകുൽ സുരേഷ് പറഞ്ഞു.
എന്നാൽ ഗോകുലിന്റെ അഭിപ്രായത്തോട് സംവിധായകൻ അരുൺ ചന്തു വിയോജിച്ചു. “മിന്നൽ പ്രതാപൻ ഫാൻസ് പ്രതിഷേധം രേഖപ്പെടുത്തുന്നു. എന്റെ ഫേവറേറ്റ് സിനിമ മനു അങ്കിൾ ആണ്. അതിൽ ഏലിയണിനെ(പാറ്റ) കാണുന്ന ഒരു സീനൊക്കെ. ഡെന്നീസ് ജോസഫ് സാറിനോട് നന്ദി പറയുന്നു. നമ്മുടെ കുട്ടിക്കാലത്ത് ഏറ്റവും കൂടുതൽ രസിപ്പിച്ച ചിത്രമായിരുന്നു. അത്രയും സ്റ്റാർസാണ് അതിൽ ഉണ്ടായിരുന്നത്. കുട്ടികൾക്ക് വേണ്ടിയുള്ള ചിത്രവും. പ്രത്യേകിച്ച്, അതിൽ എസ് ജിയുടെ കാമിറോ റോൾ. ഒത്തിരി ഇഷ്ടമാണ് എനിക്ക്” – ഗോഗുൽ സുരേഷിന് മറുപടിയായി സംവിധായകൻ പറഞ്ഞു.
