കുമ്പളങ്ങയാണോ? എന്നാൽ വേണ്ടെന്ന് പറഞ്ഞ് ചിലരെങ്കിലും മാറ്റി നിർത്താറുണ്ട്. എന്നാൽ ഇങ്ങനെ മാറ്റി നിർത്തപ്പെടേണ്ടവനല്ല കുമ്പളങ്ങ. ഒട്ടനവധി പോഷക ഗുണങ്ങളുള്ള പച്ചക്കറിയാണിത്. കുമ്പളങ്ങയുടെ ആരോഗ്യഗുണങ്ങൾ അറിഞ്ഞാൽ ഈ പച്ചക്കറിയെ ആരും ഒഴിവാക്കില്ല.
നിർജ്ജലീകരണം തടയുന്നതിന് ഉത്തമമാണ് കുമ്പളങ്ങ. ഇത് പാകം ചെയ്ത് കഴിക്കാൻ ഇഷ്ടമില്ലാത്തവർക്ക് ജ്യൂസായും കുടിക്കാവുന്നതാണ്. വിറ്റാമിൻ സി, നിയാസിൻ, തയാമിൻ, റൈബോഫ്ളാവിൻ, പ്രോട്ടീൻ, ഫ്ളേവനോയ്ഡുകൾ, ഗ്ലൈക്കോസൈഡ്സ്, കരോട്ടിൻ, യൂറോനിക് ആസിഡ് തുടങ്ങിയ പോഷകഘടങ്ങളാണ് കുമ്പളങ്ങയിൽ അടങ്ങിയിരിക്കുന്നത്.
കുമ്പളത്തിന്റെ പൂക്കൾ മുതൽ വിത്തുകൾ വരെ നമുക്ക് പ്രയോജനകരമാണ്. കുമ്പളത്തിന്റെ മഞ്ഞപ്പൂക്കൾ സന്നിപാതജ്വരം പോലുള്ള വിവിധ രോഗങ്ങളെ ചെറുക്കുന്നതിനായി ഉപയോഗിക്കുന്നു. മൂത്രനാളി രോഗങ്ങളെ തടയാനും വരണ്ട ചുമ അകറ്റാനും കുമ്പളങ്ങ വിത്തുകൾ ചുട്ടെടുത്ത് കഴിക്കാം.
കുമ്പളങ്ങയുടെ പൂവും, വിത്തും, കാമ്പും മാത്രമേ ഉപയോഗിക്കാൻ സാധിക്കുകയുള്ളൂവെന്നായിരിക്കും നിങ്ങൾ ഇപ്പോൾ ആലോചിക്കുന്നത്. അല്ല! കുമ്പളവള്ളിയും ആള് നിസാരക്കാരനല്ല. കുമ്പളവള്ളി ചുട്ട് ഭസ്മമുണ്ടാക്കാം. ഇത് മരോട്ടിയെണ്ണയിൽ ചാലിച്ച് ചുണങ്ങുള്ള ഭാഗത്ത് പുരട്ടുന്നത് പാടുകൾ മാറുന്നതിന് സഹായിക്കുന്നു.
ചർമ്മ സൗന്ദര്യം വർദ്ധിപ്പിക്കാൻ കുമ്പളങ്ങ വെറുതെയോ അല്ലാതെയോ കഴിക്കാം. ചർമ്മം തിളക്കമുള്ളതാക്കാനും വരണ്ട ചർമ്മം ഇല്ലാതാക്കാനും കുമ്പളങ്ങ ദിവസവും കഴിക്കുന്നത് നല്ലതാണ്.
