ഒരുകാലത്ത് കോമഡി വേഷങ്ങളിൽ തിളങ്ങി നിന്ന താരമായിരുന്നു ഇന്ദ്രൻസ്. തന്റെ ശരീരവും ശബ്ദവും ഉപയോഗിച്ച് ജനങ്ങളെ പൊട്ടിച്ചിരിപ്പിച്ച താരം. എന്നാൽ പുതിയ കാലത്ത് ഇന്ദ്രൻസ് എന്ന് കേൾക്കുമ്പോൾ കരുത്തുറ്റ കഥാപാത്രങ്ങളാണ് മനസ്സിലേക്ക് ഓടിയെത്തുക. ഇപ്പോഴിതാ, പഴയ കാലത്തെയും പുതിയ കാലത്തെയും സിനിമാ ലൊക്കേഷൻ അനുഭവങ്ങളിലുള്ള വ്യത്യാസത്തെപ്പറ്റി പറയുകയാണ് ഇന്ദ്രൻസ്. പണ്ട് ചെയ്തിരുന്ന കഥാപാത്രങ്ങൾ ചെയ്യാൻ ഇന്ന് ആഗ്രഹിക്കുന്നുണ്ടെന്നും മനസ് പിന്നോട്ട് വലിക്കുന്നുണ്ടെന്നും ഒരു ഓൺലൈൻ മാധ്യമത്തിന് നൽകിയ അഭിമുഖത്തിൽ താരം പറഞ്ഞു.
“പഴയതുപോലെ തന്നെയാണ്. ഇപ്പോഴുള്ള സിനിമാക്കാരും വളരെ ഫ്രണ്ട്ലി ആയിട്ടാണ് വർക്ക് ചെയ്യുന്നത്. പക്ഷേ അതുപോലെ എനിക്ക് പറ്റുന്നില്ല. ഇപ്പോഴത്തെ കുട്ടികൾ കൂടിയിരിക്കുന്നിടത്ത് നമ്മൾ ചെന്നാൽ അവർ മാറിപ്പോയി ഇരിക്കും. നമ്മുടെ അച്ഛനോ അമ്മയോ അടുത്തേക്ക് വന്നാൽ കുട്ടികൾ മാറിപ്പോയി ഇരിക്കാറുണ്ടല്ലോ, അതുപോലെ. അവർ അവരുടെ തരക്കാരുമായി ഒരുമിച്ചിരിക്കുന്നു. ആ അകലം എന്നെപ്പോലെ പ്രായമായ ആൾക്കാർ അനുഭവിക്കുന്നു. അവരുടെ കൂട്ടുകെട്ടും കൂടിച്ചേരലും ആഘോഷവുമൊക്കെ സിനിമാ സെറ്റിൽ ഉണ്ട്. അവർക്ക് സ്വാതന്ത്ര്യമായി സംസാരിക്കാൻ കഴിയുന്നുണ്ടാകില്ല. ഒഴിവാക്കൽ അല്ലെങ്കിൽ പോലും നമുക്ക് അത് അറിയാം”.
“പഴയ തരത്തിലുള്ള കഥാപാത്രങ്ങൾ ചെയ്താൽ കൊള്ളാം എന്ന് തോന്നാറുണ്ട്. മനസ്സ് പിന്നോട്ട് വലിക്കുന്നുണ്ട്. പഴയപോലെ കോമഡി റോൾ ചെയ്യാൻ നിരന്തരം തോന്നാറുണ്ട്. പണ്ട് കൊടക്കമ്പി എന്നു വിളിക്കുന്നത് ഞാൻ ആഘോഷിച്ചിട്ടേ ഉള്ളൂ. ചെയ്ത കഥാപാത്രങ്ങൾ അത്രത്തോളം ജനങ്ങളിലേക്ക് എത്തി എന്നുള്ള സംതൃപ്തി തോന്നുമായിരുന്നു”-ഇന്ദ്രൻസ് പറഞ്ഞു.
