അനന്ത് അംബാനിയുടെയും രാധിക മെർച്ചന്റിന്റെയും വിവാഹത്തിന് മുന്നോടിയായി നടന്ന സംഗീതിൽ അണിനിരന്ന് ബോളിവുഡ് താരനിര. മുംബൈയിലെ അംബാനി കുടുംബത്തിന്റെ ഉടമസ്ഥതയിലുള്ള കൾച്ചറൽ സെന്ററിലാണ് സംഗീത് ആഘോഷങ്ങൾ നടന്നത്. ബോളിവുഡിൽ നിന്ന് നിരവധി താരങ്ങളാണ് ആഘോഷത്തിൽ പങ്കെടുത്തത്.
സിദ്ധാർത്ഥ് മൽഹോത്ര, കിയാര അദ്വാനി, ആലിയ ഭട്ട്, രൺബീർ കപൂർ, വരുൺ ധവാൻ, മാധുരി ദീക്ഷിത്, ദീപിക പദുക്കോൺ, സൽമാൻ ഖാൻ തുടങ്ങിയവർ സംഗീത് ചടങ്ങുകളുടെ ഭാഗമായി. ക്രിക്കറ്റ് താരങ്ങളായ എംഎസ് ധോണി, ഭാര്യ സാക്ഷി, ടി-ട്വന്റി ലോകകപ്പിൽ വിജയിച്ച ഇന്ത്യയുടെ അഭിമാന താരങ്ങളായ ഹർദിക് പാണ്ഡ്യ, സൂര്യകുമാർ യാദവ് എന്നിവരും ചടങ്ങിൽ പങ്കെടുത്തു. ഭാര്യ ദേവിഷ ഷെട്ടിയോടൊപ്പമാണ് സൂര്യകുമാർ യാദവ് സംഗീതിനെത്തിയത്.
പരമ്പരാഗത വസ്ത്രമണിഞ്ഞാണ് താരങ്ങൾ ചടങ്ങിനെത്തിയത്. താരങ്ങളുടെ ചിത്രങ്ങൾ സമൂഹമാദ്ധ്യമങ്ങളിലൂടെ പുറത്തുവന്നിട്ടുണ്ട്. ആഘോഷത്തിനിടെ അനന്ത് അംബാനിയോടൊപ്പം ചുവടുവയ്ക്കുന്ന സൽമാൻ ഖാന്റെ വീഡിയോയും സമൂഹമാദ്ധ്യമങ്ങളിൽ വൈറലാവുകയാണ്. കറുപ്പ്, വെള്ള, ക്രീം, ഗോൾഡ് തുടങ്ങിയ നിറത്തിലുള്ള വസ്ത്രങ്ങളാണ് താരങ്ങൾ ധരിച്ചിരിക്കുന്നത്.
വിദ്യാ ബാലൻ, അർജുൻ കപൂർ, ആദിത്യ റോയ് കപൂർ, അനന്യ പാണ്ഡെ എന്നിവരും ചടങ്ങിൽ പങ്കെടുത്തു. കനേഡിയൻ പോപ്പ് താരം ജസ്റ്റിൻ ബീബറിന്റെ അതിഗംഭീര പ്രകടനം ആഘോഷത്തിന്റെ മാറ്റ് ഇരട്ടിയാക്കി. ഇതിന്റെ ചിത്രങ്ങളും വീഡിയോകളും സമൂഹമാദ്ധ്യമത്തിൽ ശ്രദ്ധേയമാകുകയാണ്.
റോയൽ മേക്കോവറിലാണ് അനന്തും രാധികയുമുള്ളത്. ഈ മാസം 12-ന് മുംബൈയിലെ ബാന്ദ്ര കുർള കോംപ്ലക്സിലെ ജിയോ വേൾഡ് കൺവെൻഷൻ സെന്ററിലാണ് ഇരുവരുടെയും വിവാഹം.
