ക്ഷേത്രത്തിന് മുൻപിൽ അതിമനോഹരമായ വെള്ളച്ചാട്ടം. അരുവിയിലെ ജലത്തിലൂടെ ചുവടുവച്ച് പാദം ശുദ്ധീകരിച്ച് ക്ഷേത്രത്തിൽ പ്രവേശിക്കാം. കോട്ടയത്തെ അരുവിക്കൽ ശ്രീ ശിവ സുബ്രഹ്മണ്യ ക്ഷേത്രത്തിന് മുൻപിലാണ് ഈ വിസ്മയം. കുറവിലങ്ങാടിനടുത്ത് കളത്തൂർ എന്ന സ്ഥലത്താണ് ക്ഷേത്രം സ്ഥിതി ചെയ്യുന്നത്.
മുന്നിലൂടെ അരുവി ഒഴുകുന്നതിനാൽ അരുവിക്കൽ എന്ന പേര് കിട്ടിയെന്നാണ് പറയപ്പെടുന്നത്. ഈ അരുവി ഒരു വെള്ളച്ചാട്ടമായാണ് ക്ഷേത്രത്തിന് മുന്നിൽ ഒഴുകി വീഴുന്നത്. മനോഹരമായിട്ടുള്ള ഒരു കാഴ്ചയാണ് ഇത് സമ്മാനിക്കുന്നത്. ഈ വെള്ളം ഒഴുകുന്ന വെള്ളച്ചാട്ടത്തിനടിയിൽ ഒരു ഗുഹ ഉണ്ടെന്നാണ് പറയുന്നത്. ഈ ക്ഷേത്രത്തിന്റെ മുന്നിൽനിന്നും ആരംഭിക്കുന്ന ഈ ഗുഹ കാഞ്ഞിരത്താനം എന്ന സ്ഥലത്താണ് അവസാനിക്കുന്നത്.
മഹാദേവനെ കൂടാതെ സുബ്രഹ്മണ്യൻ, ശാസ്താവ്, ഭഗവതി, യക്ഷി, സർപ്പങ്ങൾ, എന്നീ ഉപദേവന്മാരുമുണ്ട്. പണ്ടുകാലത്ത് ക്ഷേത്രത്തിൽ മഹാവിഷ്ണുവിന്റെ പ്രതിഷ്ഠ കൂടി ഉണ്ടായിരുന്നുവെന്നാണ് പറയപ്പെടുന്നത്. ഏറ്റുമാനൂർ മഹാദേവ ക്ഷേത്രവും പരിസരവും ശാപം മൂലം വർഷങ്ങളോളം ആരാധന മുടങ്ങി വനമായി കിടന്നിരുന്നു. ഈ കാലയളവിൽ മഹാദേവനെ ആരാധിക്കാനായി നിർമിച്ച ക്ഷേത്രമാണിതെന്ന് ഐതിഹ്യങ്ങളിൽ പറയുന്നു.
കന്നിമാസത്തിലെ ആയില്യം നാളിൽ പ്രത്യേക പൂജയും നൂറും പാലും സമർപ്പിക്കുന്ന ചടങ്ങും നടത്തിവരുന്നു. ശിവരാത്രിയും പ്രധാനമാണ്. അന്നേ ദിവസം വിശേഷാൽ ശിവരാത്രി പൂജയും അഷ്ഠാഭിഷേകവും നടത്തും. കർക്കിടക വാവുബലി ദിനത്തിൽ പിതൃതർപ്പണത്തിനായി ആയിരങ്ങളാണ് ഇവിടെ എത്തുന്നത്. കോട്ടയം പട്ടിത്താനം എംസി റോഡിൽ നിന്ന് കുറവിലങ്ങാട് പോകുന്ന വഴിയിലൂടെ സഞ്ചരിച്ചാൽ അരുവിക്കൽ ക്ഷേത്രത്തിലെത്താം.
