ഇടുക്കി എന്നും മിടുക്കിയാണ്. കുന്നുകളിലും മലകളിലും സൗന്ദര്യമൊരുക്കി സഞ്ചാരികളെ മാടി വിളിക്കുകയാണ് ഇടുക്കി. കുന്നുകളെ തലോടിയിറങ്ങി വരുന്ന കോടയും നുരുഞ്ഞൊഴുകുന്ന വെള്ളച്ചാട്ടങ്ങളും ആരെയും ഒന്നാകർഷിക്കും. കുന്നിൻ മുകളിൽ നിന്നുള്ള കിടിലൻ വ്യൂ കാണാനായി ആയിരങ്ങളാണ് ഇടുക്കിക്ക് വണ്ടി കയറുന്നത്.
അത്തരത്തിൽ മലമുകളിൽ നിന്ന് തമിഴ്നാടിന്റെ ഭംഗി ആസ്വദിക്കാൻ കഴിയുന്നൊരു ഇടമുണ്ട് ജില്ലയിൽ. കുമളിക്കടുത്ത് ചക്കുപള്ളം പഞ്ചായത്തിലെ ചെല്ലാർകോവിൽ അരുവിക്കുഴി പ്രദേശമാണ് തലയുയർത്തി സഞ്ചരികളെ ആകർഷിക്കുന്നത്. തമിഴ്നാടിന്റെ വിദൂരക്കാഴ്ചകളും അതിനപ്പുറം ഒരു കൊച്ചരുവി വെള്ളച്ചാട്ടമായി മാറുന്നതിന്റെ അതിമനോഹര കാഴ്ചകളുമാണ് അരുവിക്കുഴിയിലുള്ളത്.
പാറക്കെട്ടിലൂടെ തമിഴ്നാട്ടിലേക്ക് കുത്തിയൊഴുകുന്ന വെള്ളച്ചാട്ടവും തമിഴ്നാടിന്റെ വിദൂര ദൃശ്യവും ഇവിടെ നിന്നും ആസ്വദിക്കാവുന്നതാണ്. തമിഴ്നാട് ലോവർ ക്യാമ്പ് വൈദ്യുതി നിലയം, ഗുഡല്ലൂർ, കമ്പം തുടങ്ങിയ സ്ഥലങ്ങളിലെ കൃഷികൾ, രാത്രികാല വിദൂര ദൃശ്യങ്ങൾ എന്നിവയെല്ലാം നവ്യാനുഭവമേകും.
ചുറ്റു തിങ്ങി നിൽക്കുന്ന പച്ചപ്പിന് നടുവിലൂടെ നീണ്ടു കിടക്കുന്ന കറുത്ത പാറക്കെട്ടിലൂടെ താഴേക്കൊഴുകുന്ന കൊച്ചരുവി അതിമനോഹരമായ ഒരു കാഴ്ചാനുഭവമാണ് നൽകുന്നത്. കുഞ്ഞുകുഞ്ഞരുവികൾ ഒന്നിച്ചൊഴുകി ഒരു ചെറിയ പുഴയായി മാറി കേരളത്തിലൂടെ ഒഴുകി അവസാനം തമിഴ്നാട്ടിലെത്തി ചേരുന്നു. പല തട്ടുകളായി പാറക്കെട്ടിലൂടെ പതിക്കുന്ന വെള്ളച്ചാട്ടത്തിന്റെ കാഴ്ച അതീവ രസകരമാണ്.
തേക്കടിയിലെത്തുന്ന സഞ്ചാരികൾക്ക് അരുവിക്കുഴി വ്യൂ പോയിന്റും കണ്ട് മടങ്ങാവുന്നതാണ്. തേക്കടിയിൽ നിന്ന് 22 കിലോമീറ്റർ ദൂരമാണ് ഇവിടെക്കുള്ളത്. ന്നാർ-കുമളി ഹൈവേയിൽ അണക്കര റോഡ് വഴി തിരിഞ്ഞാൽ ചെല്ലാർകോവിലിലെത്താം.
