മുംബൈ: മുൻ ഇന്ത്യൻ താരം ഗൗതം ഗംഭീർ ഇന്ത്യൻ പുരുഷ ടീമിന്റെ മുഖ്യ പരിശീലകൻ. ഔദ്യോഗിക പ്രഖ്യാപനം നടത്തി ബിസിസിഐ സെക്രട്ടറി ജയ് ഷാ. ഇന്ത്യൻ ക്രിക്കറ്റിനെ മുന്നോട്ട് നയിക്കാൻ ഏറ്റവും അനുയോജ്യൻ ഗംഭീർ ആണെന്നും സെക്രട്ടറി വ്യക്തമാക്കി. ടി20 ലോകകപ്പോടെ പടിയിറങ്ങിയ രാഹുൽ ദ്രാവിഡിന് പകരമായാണ് ഇന്ത്യയുടെ ലോകകപ്പ് ഹീറോ എത്തുന്നത്.
ടീം ഇന്ത്യയെക്കുറിച്ചുള്ള അദ്ദേഹത്തിന്റെ വ്യക്തമായ കാഴ്ചപ്പാടും ക്രിക്കറ്ററെന്ന നിലയിലെ അദ്ദേഹത്തിന്റെ വിപുലമായ അനുഭവവും പുതിയ റോളിന് ഗൗതം ഗംഭീറിനെ കൂടുതൽ അർഹനാക്കുന്നുവെന്നും ബിസിസിഐ അദ്ദേഹത്തിന് പരിപൂർണ പിന്തുണ നൽകുന്നുണ്ടെന്നും ജയ്ഷാ വ്യക്തമാക്കി. ജൂലായ് 27ന് തുടങ്ങുന്ന ശ്രീലങ്കൻ പര്യടനത്തോടെയാകും അദ്ദേഹം ചുമതലയേൽക്കുക.
മൂന്നര വർഷത്തേക്കാണ് ഗംഭീറിന്റെ നിയമനം. അദ്ദേഹത്തിന്റെ താത്പ്പര്യ പ്രകാരമാകും സപ്പോർട്ടിംഗ് സ്റ്റാഫിനെ നിയമിക്കുക. 2027-ൽ നടക്കുന്ന ഏകദിന ക്രിക്കറ്റ് ലോകകപ്പുവരെയാകും ഗംഭീറിന്റെ കാലാവധി. മൂന്നു ഫോർമാറ്റിലും ഒരു പരിശീലകൻ മതിയെന്ന തീരുമാനത്തിലേക്ക് ബിസിസിഐ എത്തുകയായിരുന്നു.
ഒരു അന്താരാഷ്ട്ര ടീമിന്റെ മുഖ്യപരിശീലകനെന്ന നിലയിൽ ഗംഭീറിന്റെ ആദ്യ അവസരമാണിത്. ഉപദേശകനെത്ത നിലയിൽ കെകെആറിനെ മൂന്നാമത് ചാമ്പ്യന്മാരാക്കിയ ഗംഭീർ ലഖ്നൗ സൂപ്പർ ജയൻ്റ്സിനെ രണ്ടു സീസണുകളിൽ സെമിയിൽ എത്തിച്ചിരുന്നു. കെ.കെ.ആറിനൊപ്പം 3 ഐ.പി.എൽ കിരീടങ്ങളും, 2012 & 2014 വർഷങ്ങളിൽ ക്യാപ്റ്റനായും ഈ വർഷം മെൻ്ററായും നേടി.
2007 ടി20- 2011 ഏകദിന ലോകകപ്പുകളിൽ ഇന്ത്യക്ക് കിരീടം സമ്മാനിക്കുന്നതിൽ നിർണായക പങ്കുവഹിച്ച ഗംഭീർ 58 ടെസ്റ്റിൽ നിന്ന് 4,154 റൺസും 147 ഏകദിനത്തിൽ നിന്ന് 5,238 റൺസും 37 ടി-20യിൽനിന്ന് 932 റൺസും നേടിയിട്ടുണ്ട്.
It is with immense pleasure that I welcome Mr @GautamGambhir as the new Head Coach of the Indian Cricket Team. Modern-day cricket has evolved rapidly, and Gautam has witnessed this changing landscape up close. Having endured the grind and excelled in various roles throughout his… pic.twitter.com/bvXyP47kqJ
— Jay Shah (@JayShah) July 9, 2024
