മണിക്കൂറിൽ 73,055 കിലോമീറ്റർ വേഗതയിൽ ഭൂമിയിലേക്ക് കുതിക്കുന്ന ഛിന്നഗ്രഹത്തെ കുറിച്ച് മുന്നറിയിപ്പുമായി നാസ. ഏകദേശം 220 അടി വ്യാസമുള്ള NF 2024 എന്ന ഛിന്നഗ്രഹം ഇന്ന് ( ജൂലൈ 17) ന് ഭൂമിക്ക് ഏറ്റവും അടുത്തെത്തും.
അപ്പോളോ ഗ്രൂപ്പിൽ ഉൾപ്പെടുന്ന നിയർ എർത്ത് ആസ്റ്ററോയിഡ് വിഭാഗത്തിൽ പെടുന്ന ഛിന്നഗ്രഹമാണ് NF 2024. നാസയുടെ ജെറ്റ് പ്രൊപ്പൽഷൻ ലബോറട്ടറിയുടെ നിരീക്ഷണം അനുസരിച്ച് ഭൂമിയിൽ നിന്ന് ഏകദേശം 48 ലക്ഷം കിലോമീറ്റർ അകലെ കൂടി ഛിന്നഗ്രഹം കടന്നുപോവും. ഭൂമിയ്ക്ക് ഭീഷണി ആകില്ലെന്നാണ് നിഗമനം.
492 അടിയിൽ കൂടുതൽ വ്യാസമുള്ളതും 74 ലക്ഷം കിമീ ദൂരപരിധിക്കുള്ളിൽ വരുന്നതുമായ ഛിന്നഗ്രഹങ്ങളെയാണ് അപകട സാധ്യതയുള്ള ഛിന്നഗ്രഹങ്ങളായി കണക്കാക്കുന്നത്.
NF 2024 ന് പുറമേ, മറ്റ് നാല് ഛിന്നഗ്രഹങ്ങൾ വരും ദിവസങ്ങളിൽ ഭൂമിയോട് അടുത്ത് എത്തുമെന്ന് നാസ റിപ്പോർട്ട് ചെയ്തു. ഇവ 4.25 ദശലക്ഷം കിലോമീറ്റർ മുതൽ 6.2 ദശലക്ഷം കിലോമീറ്റർ അകലത്തിലൂടെ സുരക്ഷിതമായി കടന്നുപോകുമെന്നാണ് വിലയിരുത്തൽ.
ഛിന്നഗ്രഹങ്ങളുടെ കൂട്ടിയടി ഭൂമിയിൽ ജീവന്റെ നിലനിൽപ്പിന് ഭീഷണിയാണെന്നാണ് പറയപ്പെടുന്നത്. അതിനാൽ ഛിന്നഗ്രഹത്തിന്റെ സഞ്ചാര ഗതിമാറ്റാൻ ലക്ഷ്യമിട്ടുള്ള ഡബിൾ ആസ്റ്ററോയിഡ് റീഡയറക്ഷൻ ടെസ്റ്റ് (DART) ദൗത്യമായി മുന്നോട്ട് പോകുകയാണ് നാസ.
