ആലപ്പുഴ: പൊലീസിനെ വെല്ലുവിളിച്ച് മണൽ കടത്തുകയും അത് റീൽസാക്കി സമൂഹമാദ്ധ്യമങ്ങളിൽ പ്രചരിപ്പിക്കുകയും ചെയ്ത സംഘത്തിന് മറുപടിയായി നിലമ്പൂർ പൊലീസിന്റെ മറ്റൊരു റീൽ. പ്രതികളെ കസ്റ്റഡിയിലെടുക്കുകയും കോടതിയിൽ ഹാജരാക്കുകയും ചെയ്തതിന് ശേഷമാണ് പൊലീസിന്റെ മറുപടി റീൽസ് പുറത്തിറക്കിയത്.
മാഫിയ സംഘം ചെയ്തത് പോലെ സിനിമാ ഡയലോഗുകൾ ചേർത്താണ് പൊലീസും റീൽസിറക്കിയിരിക്കുന്നത്. ആക്ഷൻ ഹീറോ ബിജു, ആവേശം, കെജിഎഫ് തുടങ്ങിയ ചിത്രങ്ങളിലെ ഡയലോഗുകളാണ് പൊലീസിന്റെ റീലിലുള്ളത്. പൊലീസിന്റെ മറുപടി റീൽ സമൂഹമാദ്ധ്യമങ്ങളിൽ ഏറെ ശ്രദ്ധേയമാവുകയാണ്.
മണൽ കയറ്റിയ ലോറി പൊലീസ് സ്റ്റേഷന് മുന്നിലൂടെ പോകുന്നതിന്റെ വീഡിയോ സിനിമാ ഡയലോഗുകൾ കൂട്ടിച്ചേർത്താണ് മണൽ മാഫിയ സംഘം ഇൻസ്റ്റഗ്രാമിൽ പങ്കുവച്ചത്. വീഡിയോ വൈറലായതിന് പിന്നാലെയാണ് പൊലീസ് അന്വേഷണം ആരംഭിച്ചത്. തുടർന്ന് ഇന്ന് രാവിലെ ഏഴ് പേരെ പിടികൂടുകയായിരുന്നു.
പൊലീസിനെതിരെ ആയുധമായാണ് ഇവർ റീൽസ് പുറത്തിറക്കിയതെന്നും പ്രതികളിൽ രണ്ട് പേർ വിദേശ രാജ്യത്തേക്ക് പോകാനായി തയ്യാറെടുത്തിരിക്കുകയാണെന്നും നിലമ്പൂർ സ്റ്റേഷനിലെ എസ്എച്ച്ഒ മനോജ് പറഞ്ഞു.
