മുടിയാണ് അഴകെന്ന് വിശ്വസിക്കുന്നവരാണ് ഭൂരിഭാഗം പേരും. നീണ്ട, കറുത്ത ഇടതൂർന്ന മുടി ആഗ്രഹിക്കാത്ത ആരാണുള്ളതല്ലേ. എന്നാൽ ബ്യൂട്ടി പാർലറിലെ മിനുക്ക് പരിപാടികളും കെമിക്കലുകൾ അടങ്ങിയ ഉത്പന്നങ്ങൾ തേക്കുന്നതും മുടിയെ സാരമായി തന്നെയാണ് ബാധിക്കുന്നത്. ഈ തിരിച്ചറിവ് പലരെയും മാറ്റി ചിന്തിക്കാൻ പ്രേരിപ്പിച്ചിട്ടുണ്ടെന്നതാണ് വസ്തുത.
ഇതോടെ മിക്കവരും പ്രകൃതിദത്ത മാർഗങ്ങളിലേക്ക് തിരിഞ്ഞിട്ടുണ്ട്. കറ്റാർവാഴയോ നെല്ലിക്കയോ ആണ് ഭൂരിഭാഗം പേരും തലമുടിക്കായി തിരഞ്ഞെടുക്കുന്നത്. ഇവയിലേതാണ് ഇടതൂർന്ന മുടിക്ക് നല്ലതെന്ന് ചിന്തിച്ചിട്ടുണ്ടോ? രണ്ടിലുമുള്ള ഗുണങ്ങളെ കുറിച്ച് അറിഞ്ഞുവേണം തലമുടിയിൽ പ്രയോഗിക്കാൻ..
കറ്റാർവാഴ
ജലാംശത്തിന്റെ കേന്ദ്രമാണ് കറ്റാർവാഴ. വിറ്റാമിൻ സി, ഇ, ബീറ്റാ കരോട്ടിൻ എന്നിവയാൽ സമ്പുഷ്ടമാണ് കറ്റാർവാഴ. ചർമ്മത്തിന്റെ സ്വാഭാവിക ഈർപ്പം നിലനിർത്തുന്നു. വിറ്റാമിനുകളും ധാതുക്കളും ഇതിൽ അടങ്ങിയിട്ടുണ്ട്. തലയോട്ടിയെ പരിപോഷിപ്പിക്കാനും താരൻ കുറയ്ക്കാനും മുടി വളരാനു കറ്റാർവാഴ ഉപയോഗിക്കാം. കറ്റാർ വാഴയിലെ ജലാംശം മുടിയുടെ ഈർപ്പം നിലനിർത്തുന്നു. പെട്ടെന്ന് പൊട്ടിപോകുന്നത് തടയുന്നു. പതിവായുള്ള ഉപയോഗം മുടി കൊഴിച്ചിൽ തടയും.
നെല്ലിക്ക
വിറ്റാമിൻ സി, ആൻ്റി ഓക്സിഡൻ്റുകൾ എന്നിവയാൽ സമ്പന്നമാണ് നെല്ലിക്ക. നിരവധി ഹെയർകെയർ ഉത്പന്നങ്ങളിൽ സ്ഥിര സാന്നിധ്യമാണ് നെല്ലിക്ക. ഇരുമ്പ്, ഫോസ്ഫറസ്, കാൽസ്യം, വിറ്റാമിൻ സി തുടങ്ങിയ അവശ്യ പോഷകങ്ങൾ അടങ്ങിയിരിക്കുന്നു. ലയോട്ടിയിലെ രക്തചംക്രമണം മെച്ചപ്പെടുത്താനും മുടിയുടെ വേരുകൾക്ക് ആവശ്യമായ പോഷകങ്ങൾ നൽകുന്നതിനും ഉത്തമമാണ്.
ഇതിലടങ്ങിയിരിക്കുന്ന ടാനിൻ തലയോട്ടിയിലെ കോശങ്ങളെ പരിപോഷിപ്പിക്കുന്നു. മുടിക്ക് ഉള്ളു വയ്ക്കാൻ സഹായിക്കുന്നു. പിഎച്ച് ലെവൽ നിയന്ത്രിക്കുന്നു.എണ്ണമയമുള്ള ചർമക്കാർക്ക് ഉത്തമമാണ്.
മികച്ചത് ഏത്
മോയ്സ്ചറൈസിംഗ് ഫലങ്ങളാണ് തിരക്കുന്നതെങ്കിൽ കറ്റാർവാഴയാണ് മികച്ച ഓപ്ഷൻ. വരണ്ട മുടിയുള്ളവർക്ക് സഹായകമാകും. മുടിയുടെ വേരുകളിലേക്കിറങ്ങി, ദീർഘകാല ഫലങ്ങളാണ് തേടുന്നതെങ്കിൽ നെല്ലിക്കയാണ് ബെസ്റ്റ് ഓപ്ഷൻ. വിട്ടുമാറാത്ത മുടി കൊഴിച്ചിലുള്ളവർ നെല്ലിത്തയെ കൂട്ടുപിടിച്ചോളൂ..
ഇവ രണ്ടും ഒന്നിച്ച് ഉപയോഗിക്കുന്നതും നല്ലതാണ്. മുട്ടോളം മുടി വളരാനായി പണ്ട് കാലം മുതൽക്കേ ഉപയോഗിക്കുന്ന ഒന്നാണ് നെല്ലിക്ക വരട്ടിക്കാച്ചിയ എണ്ണ. രണ്ടോ മൂന്നോ നെല്ലിക്ക കഴുകി ഇരുമ്പ് ചട്ടിയിൽ എള്ളെണ്ണ ഉപയോഗിച്ച് ചൂടാക്കിയെടുക്കുക. ഇതിലേക്ക് കറിവേപ്പില, കറ്റാർവാഴ എന്നിവ അരിഞ്ഞിട്ട് ചൂടാക്കണം. നെല്ലിക്ക കറുത്ത നിറത്തിലാകും വരെ ചൂടാക്കണം. ഇതിലേക്ക് ആവശ്യത്തിന് എള്ളെണ്ണ ഒഴിച്ച് തിളപ്പിക്കുക. ചൂടാറി കഴിഞ്ഞ് വൈറ്റമിൻ ഇ, ആവണക്കെണ്ണ എന്നിവ ഒഴിക്കുക. ഊറ്റിയെടുത്ത് ഉപയോഗിക്കാവുന്നതാണ്.
