ന്യൂഡൽഹി: സംവരണ വിഷയത്തിൽ കോൺഗ്രസ് എംപിയും പ്രതിപക്ഷ നേതാവുമായ രാഹുൽ ഗാന്ധി യുഎസിൽ വച്ച് നടത്തിയ പരാമർശങ്ങൾക്കെതിരെ രൂക്ഷ വിമർശനവുമായി ജൻ സൂരജ് അദ്ധ്യക്ഷൻ പ്രശാന്ത് കിഷോർ. സംവരണത്തിന്റെ ക്വോട്ട വർദ്ധിപ്പിക്കുന്നതിനെ ഏതാനും മാസങ്ങൾക്ക് മുൻപ് വരെ അനുകൂലിച്ചാണ് സംസാരിച്ചിരുന്നതെന്നും, എന്നാലിപ്പോൾ സംവരണം എടുത്തുകളയുന്നതിനെ കുറിച്ചാണ് സംസാരിക്കുന്നതെന്നും പ്രശാന്ത് കിഷോർ പറയുന്നു.
എപ്പോൾ എന്താണ് പറയുന്നതെന്ന് രാഹുലിന് തന്നെ നിശ്ചയമില്ലാത്ത അവസ്ഥയാണെന്നും പ്രശാന്ത് കിഷോർ പരിഹസിച്ചു. ” കുറച്ച് മാസങ്ങൾക്ക് മുൻപ് വരെ ജാതി സെൻസസിനെ അനുകൂലിച്ചും സംവരണം വർദ്ധിപ്പിക്കണമെന്നുമെല്ലാം രാഹുൽ ഗാന്ധി പറഞ്ഞിരുന്നു. എന്നാലിപ്പോൾ അമേരിക്കയിൽ ചെന്നിട്ട് സംവരണം എടുത്ത് കളയുന്നതിനെ കുറിച്ച് സംസാരിക്കുന്നു. ഇവിടെ വച്ച് പറയുന്നതല്ല അമേരിക്കയിൽ ചെന്നിട്ട് പറയുന്നത്.
തെരഞ്ഞെടുപ്പുകൾ വരുമ്പോൾ സംവരണം വർദ്ധിപ്പിക്കുന്നതിനെ കുറിച്ചും, ജാതി സെൻസസ് നടപ്പിലാക്കുന്നതിനെ കുറിച്ചുമെല്ലാം രാഹുൽ സംസാരിക്കുന്നു. പിന്നെ ഇപ്പോൾ എന്തിനാണ് അദ്ദേഹം തന്റെ അഭിപ്രായം മാറ്റിയത്. പരസ്പരവിരുദ്ധമായ കാര്യങ്ങളാണ് പറയുന്നത്. രാഹുലിന്റെ കൂടെയുള്ള കോൺഗ്രസ് നേതാക്കൾക്ക് മാത്രമേ ഇക്കാര്യത്തിൽ കൂടുതൽ എന്തെങ്കിലും പറയാനാകൂ. എന്ത് എപ്പോൾ എങ്ങനെ പറയണമെന്നോ, പറയുന്നത് എന്താണെന്നോ പലപ്പോഴും രാഹുലിന് പോലും അറിയാത്ത സ്ഥിതിയാണെന്നും” പ്രശാന്ത് കിഷോർ പറഞ്ഞു.
