മമ്മൂട്ടി നായകനായെത്തി മലയാള സിനിമാ ലോകത്ത് വൻ ഹിറ്റായി മാറിയ ചിത്രമാണ് ഒരു വടക്കൻ വീരഗാഥ. റീ റിലീസ് കാലത്ത് ഒരു വടക്കൻ വീരഗാഥയും എത്തുന്നുവെന്ന വാർത്തകൾ അടുത്തിടെ പുറത്തുവന്നിരുന്നു. മലയാളികളുടെ മനസിൽ ഇടംനേടിയ ഒരുപിടി മമ്മൂട്ടി കഥാപാത്രങ്ങളിൽ ഒന്നാണ് ചിത്രത്തിലെ ചന്തു ചേകവർ. ആ കഥാപാത്രവും കഥയും ഒരിക്കൽ കൂടി ബിഗ്സ്ക്രീനിൽ എത്തുന്നതിന്റെ സന്തോഷത്തിലാണ് മലയാളി പ്രേക്ഷകർ. ഇതിനിടെ റീ റിലീസിന്റെ സന്തോഷം പങ്കുവയ്‌ക്കുകയാണ് മമ്മൂട്ടി. സിനിമയുടെ ടീസറും മമ്മൂട്ടി പങ്കുവച്ചു.
“മലയാള സിനിമയ്‌ക്കും എനിക്കും ഒരുപാട് നേട്ടങ്ങൾ സമ്മാനിച്ച സിനിമയാണ് ഒരു വടക്കൻ വീരഗാഥ. പ്രിയപ്പെട്ട എംടി വാസുദേവൻ തിരക്കഥ എഴുതി ഹരിഹരൻ സംവിധാനം ചെയ്ത് ഗൃഹലക്ഷ്മി പ്രൊഡക്ഷൻ നിർമിച്ച്, 1980 -ൽ പുറത്തിറങ്ങിയ സിനിമ വീണ്ടും പുതിയ സാങ്കേതികവിദ്യയുടെ സഹായത്തോടെ റിലീസ് ചെയ്യുകയാണ്.
ഈ സിനിമ 4k അറ്റ്മോസിൽ വീണ്ടും റിലീസ് ചെയ്യണമെന്ന് ആഗ്രഹിച്ച വ്യക്തിയാണ് പി വി ഗംഗാധരൻ. പക്ഷേ, അന്ന് അത് നടക്കാതെ പോയി. ഇന്ന് അദ്ദേഹത്തിന്റെ മക്കൾ ആ ആഗ്രഹം സാക്ഷാത്കരിക്കുകയാണ്”. നേരത്തെ കണ്ടവർക്ക് ഒരിക്കൽ കൂടി കാണാനും പുതിയ കാഴ്ചക്കാർക്ക് പുതിയ കാഴ്ചശബ്ദ മികവോട് കൂടി കാണാനുമുള്ള അവസരമാണ് ഒരുക്കി കൊടുക്കുന്നതെന്നും മമ്മൂട്ടി വീഡിയോയിൽ പറ‍യുന്നു.
