വാഷിംഗ്ടൺ: ഇസ്രായേൽ ഇറാനെതിരെ നടത്തുന്ന ആക്രമണങ്ങൾ ഒരിക്കലും അവരുടെ ആണവ കേന്ദ്രങ്ങളെയോ എണ്ണ ശുദ്ധീകരണ ശാലകളെയോ ലക്ഷ്യമിട്ടുള്ളതാകില്ലെന്ന് യുഎസ് മാദ്ധ്യമങ്ങൾ. ഇത് സംബന്ധിച്ച് ഇസ്രായേൽ വൈറ്റ് ഹൗസിന് ഉറപ്പ് നൽകിയിട്ടുണ്ടെന്നും റിപ്പോർട്ടുകളിൽ പറയുന്നു. ഇസ്രായേൽ ഹിസ്ബുള്ള ഭീകരർക്കെതിരായി നടത്തിയ ആക്രമണത്തിന് പിന്നാലെയാണ് ഇറാൻ ഇസ്രായേലിലേക്ക് ബാലിസ്റ്റിക് മിസൈലുകൾ വിക്ഷേപിച്ചത്.
ഇറാന് ശക്തമായ തിരിച്ചടി നൽകുമെന്ന് ഇസ്രായേലും സഖ്യകക്ഷിയായ അമേരിക്കയും അറിയിച്ചിരുന്നു. എന്നാൽ ഇസ്രായേൽ ഇറാന്റെ ആണവ കേന്ദ്രങ്ങൾ ലക്ഷ്യമിടുകയാണെന്ന തരത്തിൽ റിപ്പോർട്ട് പുറത്ത് വന്നിരുന്നു. അത്തരമൊരു നീക്കം ഇസ്രായേലിന്റെ ഭാഗത്ത് നിന്നുണ്ടായാൽ അത് സാഹചര്യങ്ങളെ കൂടുതൽ ദുഷ്കരമാക്കുമെന്ന് അഭിപ്രായം ഉയർന്നിരുന്നു. ഇറാന്റെ ആണവ കേന്ദ്രങ്ങളെ ലക്ഷ്യമിടരുതെന്ന് അമേരിക്കയും ഇസ്രായേലിനോട് അഭ്യർത്ഥിരുന്നു.
യുഎസ് പ്രസിഡന്റ് ജോ ബൈഡനും ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവും തമ്മിൽ നടത്തിയ സംഭാഷണത്തിലും യുഎസ് പ്രതിരോധ സെക്രട്ടറി ലോയ്ഡ് ഓസ്റ്റിനും ഇസ്രായേലി കൗൺസിലറും തമ്മിൽ നടത്തിയ സംഭാഷണങ്ങളിലും ഈ വിഷയം ചർച്ചയായതായി റിപ്പോർട്ടിൽ പറയുന്നു. ഇസ്രായേൽ നടത്തുന്ന പ്രത്യാക്രമണങ്ങൾ ഒരിക്കലും ആണവ കേന്ദ്രങ്ങളെ ലക്ഷ്യമിടില്ലെന്നും, അവരുടെ സൈനിക കേന്ദ്രങ്ങളെ മാത്രം ലക്ഷ്യമിട്ടുള്ളതായിരിക്കുമെന്നും നെതന്യാഹു ഉറപ്പ് നൽകിയതായാണ് വിവരം.
യുദ്ധം കൂടുതൽ ഇടങ്ങളിലേക്ക് വ്യാപിച്ചാൽ അത് എണ്ണവില ഉയരുന്നത് ഉൾപ്പെടെയുള്ള പ്രതിസന്ധികൾക്ക് കാരണമാകും. അതിനാൽ ഇറാന്റെ ആണവ, എണ്ണ ശു്ദ്ധീകരണ ശാലകൾ ഒരിക്കലും ഇസ്രായേലിന്റെ ലക്ഷ്യത്തിലുള്ളതാകരുതെന്നാണ് ബൈഡൻ ആവശ്യപ്പെട്ടത്. ഇക്കഴിഞ്ഞ ഏപ്രിൽ മാസത്തിൽ ഇറാൻ ഇസ്രായേലിന് നേരെ മിസൈൽ, ഡ്രോൺ ആക്രമണങ്ങൾ നടത്തിയിരുന്നു. അതിന് ശേഷം ഇറാൻ നേരിട്ട് ഇസ്രായേലിനെതിരെ നടത്തുന്ന രണ്ടാമത്തെ ആക്രമണമായിരുന്നു ഇത്.
