മുംബൈ: എൻസിപി നേതാവും മഹാരാഷ്ട്ര മുൻ മന്ത്രിയുമായ ബാബ സിദ്ദിഖിനെ കൊലപ്പെടുത്തിയ കേസിൽ ഒരാളെ കൂടി മുംബൈ പൊലീസ് അറസ്റ്റ് ചെയ്തു. ഉത്തർപ്രദേശിലെ ബഹ്റൈച്ച് സ്വദേശി ഹരീഷ്കുമാർ ബാലക്രം (23) ആണ് പ്രതിയെന്ന് തിരിച്ചറിഞ്ഞതായി പോലീസ് ഉദ്യോഗസ്ഥർ പറഞ്ഞു. പൂനെയിൽ സ്ക്രാപ്പ് ഡീലറായി ജോലി ചെയ്യുകയായിരുന്നു ബാലക്രം. സിദ്ദിഖിനെ കൊലപ്പെടുത്താനുള്ള ഗൂഢാലോചനയുടെ ഭാഗമായിരുന്നു ഇയാളെന്നും പ്രതിയെന്നും അദ്ദേഹം പറഞ്ഞു.
ബഹ്റൈച്ചിൽ നിന്നാണ് ഇയാളെ പിടികൂടിയത്. ഇതോടെ സിദ്ദിഖിന്റെ കൊലപാതകവുമായി ബന്ധപ്പെട്ട് നാല് പേരാണ് ഇതുവരെ അറസ്റ്റിലായത്.
ഹരിയാന സ്വദേശിയായ ഗുർമൈൽ ബൽജിത് സിംഗ് (23), ഉത്തർപ്രദേശ് സ്വദേശി ധർമ്മരാജ് രാജേഷ് കശ്യപ് (19), പ്രവീൺ ലോങ്കറെയും പൂനെയിൽ നിന്ന് പോലീസ് നേരത്തെ അറസ്റ്റ് ചെയ്തിരുന്നു.
മറ്റൊരു പ്രതിയായ ബഹ്റൈച്ച് സ്വദേശിയായ മറ്റൊരു ഷൂട്ടർ ശിവകുമാർ ഗൗതം ഒളിവിലാണ്.
ബാബ സിദ്ദിഖിനെ മുംബൈയിലെ നിർമൽ നഗർ ഏരിയയിൽ, അദ്ദേഹത്തിന്റെ മകൻ സീഷാൻ സിദ്ദിഖിന്റെ ഓഫീസിന് പുറത്ത് വെച്ച് ശനിയാഴ്ച രാത്രിയാണ് വെടിവെച്ച് വീഴ്ത്തിയത്. ഉടൻ തന്നെ ലീലാവതി ആശുപത്രിയിൽ എത്തിച്ചെങ്കിലും മരിച്ചു.
