പാലക്കാട്: വോട്ടെടുപ്പിന് മണിക്കൂറുകൾ മാത്രം ശേഷിക്കെ പാലക്കാട്ടിലെ ജനങ്ങളോട് വോട്ടഭ്യർത്ഥിച്ച് ബിജെപി സ്ഥാനാർത്ഥി സി കൃഷ്ണകുമാർ. പാലക്കാടിലെ ജനങ്ങൾക്കായി ബിജെപി വാഗ്ദാനം ചെയ്യുന്നത് സമഗ്ര വികസനമാണെന്ന് അദ്ദേഹം പറഞ്ഞു. ജനങ്ങൾ അധികാരത്തിലെത്തിച്ചാൽ പാലക്കാട്ടുകാരുടെ ആരോഗ്യ പ്രശ്നങ്ങൾക്കും കാർഷിക ഗതാഗത ആവശ്യങ്ങൾക്കും പരിഹാരം കാണുമെന്നും സി കൃഷ്ണകുമാർ പറഞ്ഞു.
എയിംസ്, കേന്ദ്ര സർക്കാർ പ്രഖ്യാപിച്ച ഇൻഡസ്ട്രിയൽ സ്മാർട്ട് സിറ്റി സമയബന്ധിതമായി നടപ്പാക്കൽ, ബാംഗ്ലൂരിൽ ജോലി ചെയ്യുന്ന യുവതി യുവാക്കളുടെ യാത്രാക്ലേശം പരിഹരിക്കാൻ വന്ദേഭാരത്, നെൽകർഷകർക്കായി പ്രത്യേക പാക്കേജ്, കൽപ്പാത്തി രഥോത്സവത്തോടനുബന്ധിച്ച് നടക്കുന്ന സംഗീതോത്സവത്തിന് സ്ഥിരം വേദി എന്നിവ പാലക്കാടിനായി എൻഡിഎ മുന്നോട്ട് വച്ച വികസനപത്രികയിലെ ലക്ഷ്യങ്ങളാണെന്നും സി കൃഷ്ണകുമാർ ചൂണ്ടിക്കാട്ടി.
പാലക്കാട്ടെ വ്യവസായ സമൂഹത്തിനും, യുവജനതയ്ക്കും, കാർഷിക സമൂഹത്തിനും നിരവധി പ്രശ്നങ്ങളുണ്ട്. ഈ പ്രശ്നങ്ങളെല്ലാം പരിഹരിക്കാൻ ഒരുമിച്ച് നിൽക്കണമെന്നും ജാതിമത രാഷ്ട്രീയ വ്യത്യാസങ്ങൾക്കതീതമായി പാലക്കാടിന്റെ വികസനത്തിനുവേണ്ടി ബിജെപിക്ക് വോട്ട് രേഖപ്പെടുത്തണമെന്നും ഫേസ്ബുക്കിൽ പങ്കുവച്ച വീഡിയോയിൽ എൻഡിഎ സ്ഥാനാർത്ഥി അഭ്യർത്ഥിച്ചു.
