ഒരുവ്യക്തി എപ്പോൾ മരിക്കുമെന്ന് ഡോക്ടർമാർക്കുപോലും പറയാൻ സാധിച്ചെന്നുവരില്ല. എന്നാൽ അതിനും ഉത്തരം കണ്ടെത്തിയിരിക്കുകയാണ് ആർട്ടിഫിഷ്യൽ ഇന്റലിജൻസ്. ഉപയോക്താക്കളുടെ ജീവിത ശീലങ്ങളെ അടിസ്ഥാനമാക്കി അവരുടെ ആയുസ് പ്രവചിക്കുന്ന AI ആപ്പായ ഡെത്ത് ക്ലോക്കാണ് ഇപ്പോൾ വളരെവേഗം ആളുകൾക്കിടയിൽ പ്രചാരം നേടിയിരിക്കുന്നത്. ജൂലൈയിൽ നിലവിൽ വന്ന ആപ്പ് ഇതിനോടകം 125,000 ലധികം പേർ ഡൗൺലോഡ് ചെയ്തതായാണ് കണക്കുകൾ. ഡെത്ത് ക്ലോക്ക് ആരോഗ്യ പ്രേമികളുടെ മാത്രമല്ല, സാമ്പത്തിക വിദഗ്ധരുടെയും സാമ്പത്തിക ആസൂത്രകരുടെയും ശ്രദ്ധ ആകർഷിക്കുകയാണ്.
1,200-ലധികം ആയുർദൈർഘ്യ പഠനങ്ങളുടെയും 53 ദശലക്ഷം പങ്കാളികളുടെയും ഒരു വലിയ ഡാറ്റാസെറ്റ് അടിസ്ഥാനമാക്കിയാണ് ആപ്പ് പ്രവചനങ്ങൾ നൽകുന്നത്. ബ്രെൻ്റ് ഫ്രാൻസണാണ് ഡെത്ത് ക്ലോക്ക് വികസിപ്പിച്ചത്. ഭക്ഷണക്രമം, വ്യായാമം, സമ്മർദ്ദം, ഉറക്കത്തിന്റെ സമയക്രമം തുടങ്ങിയ ഘടകങ്ങൾ കണക്കിലെടുത്താണ് ആപ്പ് ഒരാളുടെ മരണത്തീയതി കണക്കാക്കുന്നത്.
വ്യക്തിപരമായ കൗതുകത്തിനപ്പുറം സാമ്പത്തിക വിദഗ്ധരും ആസൂത്രകരുമാണ് ഡെത്ത് ക്ലോക്കിന് പിന്നാലെ പായുന്നത്. വിരമിക്കൽ വരുമാനം മുതൽ ലൈഫ് ഇൻഷുറൻസ്, പെൻഷൻ ഫണ്ടുകളിലെ പോളിസി കവറേജ് വരെ, സാമ്പത്തികമായ കണക്കുകൂട്ടലുകളിൽ ആയുസൊരു നിർണായക ഘടകമാണ്. AI ഡെത്ത് ക്ലോക്കിന് സാമ്പത്തിക ആസൂത്രണത്തിൽ വിപ്ലവം സൃഷ്ടിക്കാൻ കഴിയുമെന്ന് ഫ്രാൻസൺ അവകാശപ്പെടുന്നു. ഒരാളുടെ മരണ തീയതി പ്രവചിക്കുന്നത് ഒരു വ്യക്തിയുടെ ജീവിതത്തിലെ ഏറ്റവും പ്രധാനപ്പെട്ടതും സ്വാധീനിക്കുന്നതുമായ തീയതിയാണെന്ന് അദ്ദേഹം വിശ്വസിക്കുന്നു.
