ആരോഗ്യ കാര്യത്തിൽ ശ്രദ്ധചെലുത്തുന്നവർക്ക് ഒഴിവാക്കാനാകാത്ത രണ്ട് നട്ട്സുകളാണ് ബദാമും നിലക്കടലയും. സ്വാദിഷ്ടമായ രുചിയും ഉയർന്ന പ്രോട്ടീനും അടങ്ങിയിട്ടുള്ളതിനാൽ നിലക്കടലയും ബദാമും ബഹുഭൂരിപക്ഷം ആളുകൾക്കും പ്രിയമാണ്. എന്നാൽ ഗുണത്തിൽ കേമൻ ആരാണ്? അറിയാം..
വിറ്റാമിൻ ഇ യും വിറ്റാമിൻ ബി യും
ബദാമും നിലക്കടലയും ശരീരത്തിന് നല്ലതാണെങ്കിലും പോഷകഘടകങ്ങൾ പ്രദാനം ചെയ്യുന്ന കാര്യത്തിൽ ഇവ തമ്മിൽ നേരിയ വ്യത്യാസങ്ങളുണ്ട്. വിറ്റാമിൻ ഇ യും ആന്റി ഓക്സിഡന്റും ലഭിക്കുന്നതിനായി ബദാമുകൾ കഴിക്കുന്നതായിരിക്കും കൂടുതൽ ഗുണം ചെയ്യുക. വിറ്റാമിൻ ഇ യ്ക്ക് പുറമെ വിറ്റാമിൻ ബി യും മഗ്നീഷ്യവും ബദാമിൽ നിന്നും ലഭിക്കുന്നു.
പ്രോട്ടീൻ
നിലക്കടലയിലും ബദാമിലും പ്രോട്ടീൻ അടങ്ങിയിരിക്കുന്നു. എന്നിരുന്നാലും മെഥിയോണിൻ, ലൈസിൻ എന്നീ രണ്ട് അമിനോ ആസിഡുകൾ ബദാമിൽ കുറവാണ്. എന്നാൽ ശരീരത്തിലേക്കാവശ്യമായ ഈ രണ്ട് അമിനോ ആസിഡുകൾ നിലക്കടലയിൽ അടങ്ങിയിരിക്കുന്നു. 100 ഗ്രാം ബദാമിൽ നിന്നും 21. 2 ഗ്രാം പ്രോട്ടീൻ ലഭിക്കുമ്പോൾ 100 ഗ്രാം നിലക്കടലയിൽ നിന്നും 24.4 ഗ്രാം പ്രോട്ടീൻ ലഭിക്കുന്നു.
കൊഴുപ്പ്
കൊഴുപ്പ് കൂടുതലടങ്ങിയ നട്ട്സുകളിലൊന്നാണ് നിലക്കടല. എന്നാൽ നിലക്കടലകളെ അപേക്ഷിച്ച് ബദാമിൽ കൊഴുപ്പ് കുറവാണ്. 100 ഗ്രാം ബദാം കഴിക്കുമ്പോൾ 3.8 ഗ്രാം കൊഴുപ്പ് മാത്രമാണ് ശരീരത്തിലേക്ക് പ്രവേശിക്കുന്നത്. അതിനാൽ വണ്ണം കുറയ്ക്കാൻ ആഗ്രഹിക്കുന്നവർക്ക് ബദാം തെരഞ്ഞെടുക്കാം. എന്നാൽ 100 ഗ്രാം നിലക്കടല കഴിക്കുമ്പോൾ 7.7 ഗ്രാം ശരീരത്തിലെത്തുന്നു. വണ്ണം വർദ്ധിപ്പിക്കാൻ ആഗ്രഹിക്കുന്നവർക്ക് നിലക്കടലയും തെരഞ്ഞെടുക്കാം.
വിലയുടെ കാര്യത്തിൽ ബദാം മുൻപന്തിയിലാണ്. എന്നാൽ ശരീരത്തിലേക്ക് പോഷകഘടകങ്ങൾ നൽകുന്ന കാര്യത്തിൽ രണ്ട് നട്ട്സുകളും മുൻപന്തിയിലാണെന്ന് പഠനങ്ങൾ പറയുന്നു.
