നമ്മുടെ അടുക്കളകളിൽ സ്ഥിരമായി കാണുന്ന ഒന്നാണ് ശർക്കര. മധുരപലഹാരങ്ങൾക്ക് പുറമെ കറികളിലും രുചി വർദ്ധിപ്പിക്കുന്നതിനായി ശർക്കര ചേർക്കാറുണ്ട്. ആരോഗ്യത്തിന്റെ കാര്യത്തിൽ ഇന്നത്തെ തലമുറ കൂടുതൽ ശ്രദ്ധാലുക്കളായതോടെ പലരും പഞ്ചസാര ഉപേക്ഷിച്ച് അതിന് പകരമായി ശർക്കരയാണ് ഉപയോഗിക്കാറുള്ളത്. ആരോഗ്യത്തിനും അത്യുത്തമമാണ് ഇതെന്നതാണ് ആളുകൾ ശർക്കര കൂടുതലായി ഉപയോഗിക്കാനുള്ള പ്രധാന കാരണം.
ശ്വസനവ്യവസ്ഥ ശുദ്ധീകരിക്കാൻ ശർക്കര സഹായിക്കുമെന്നാണ് പഠനങ്ങൾ പറയുന്നത്. പ്രത്യേകിച്ച് വായുമലിനീകരണം കൂടുതലുള്ള ഇടങ്ങളിൽ താമസിക്കുന്നവർ അവരുടെ ഭക്ഷണത്തിൽ കൂടുതലായി ശർക്കര ഉൾപ്പെടുത്തുന്നത് നല്ലതാണെന്നും ആരോഗ്യ വിദഗ്ധർ പറയുന്നു. മ്യൂക്കസ് നീക്കം ചെയ്യാനും, തൊണ്ട ശുദ്ധീകരിക്കാനും, പ്രതിരോധശേഷി വർദ്ധിപ്പിക്കാനും, അശുദ്ധവായു ശ്വസിക്കുന്നത് വഴിയുള്ള വീക്കം തടയാനുമെല്ലാം ശർക്കര സഹായകമാണ്.
ശ്വസനവ്യവസ്ഥയെ ശുദ്ധീകരിക്കാൻ സഹായിക്കുന്ന പ്രകൃതിദത്ത ഉപാധിയാണ് ശർക്കര. ശ്വാസകോശത്തിലെത്തുന്ന മലിന വസ്തുക്കളെ ഇത് പുറന്തള്ളുന്നു. ശർക്കരയിൽ അടങ്ങിയിരിക്കുന്ന മഗ്നീഷ്യം, പൊട്ടാസ്യം, എന്നിവ പൊടികളും ദുഷിച്ച കണികകളും പുറന്തള്ളുന്നതിന് സഹായിക്കുന്നു. ശ്വാസകോശത്തിൽ അടിഞ്ഞുകൂടുന്ന കഫം പുറന്തള്ളാനും ശർക്കര സഹായിക്കും. ചെറുചൂടുവെള്ളത്തിൽ അൽപ്പം ശർക്കരയും ഇഞ്ചിയും ചേർത്ത് പതിവായി കഴിക്കുന്നത് ശ്വാസനാളിയുടെ ശുദ്ധീകരണത്തിന് നല്ലതാണ്.
ശ്വാസകോശ സംബന്ധമായ അണുബാധകൾക്കെതിരെ പ്രതിരോധശേഷി നൽകുന്നു. മലിനവായു ശ്വസിക്കുന്നത് തൊണ്ടയിൽ അസ്വസ്ഥതയും അലർജിയും ഉണ്ടാകാനുള്ള കാരണമാണ്. ഒരു ചെറിയ കഷണം ശർക്കര കഴിക്കുകയോ, ശർക്കര ചൂടുവെള്ളത്തിൽ ചേർത്ത് കഴിക്കുന്നതോ വഴി പ്രതിരോധശേഷി ശക്തിപ്പെടുന്നു. ചുമ കുറയ്ക്കാനും ഇത് നല്ലതാണ്. ശ്വാസകോശത്തിലുണ്ടാകുന്ന വീക്കം കുറയ്ക്കാനും ശർക്കരയിലെ ആന്റി ഇൻഫ്ളമേറ്ററി ഘടകങ്ങൾ സഹായിക്കുമെന്ന് കണ്ടെത്തിയിട്ടുണ്ട്. ആസ്തമ പോലുള്ള അസുഖങ്ങൾ ഉള്ളവർ മഞ്ഞളിനൊപ്പം ശർക്കര ചേർത്ത് കഴിച്ചാൽ ഇരട്ടിഫലം ലഭിക്കുമെന്നും പഠനങ്ങൾ ചൂണ്ടിക്കാണിക്കുന്നു.
