കാബൂൾ: ചാവേർ സ്ഫോടനത്തിൽ താലിബാന്റെ അഭയാർത്ഥികാര്യ മന്ത്രി ഖലീൽ ഉർ-റഹ്മാൻ ഹഖാനി കൊല്ലപ്പെട്ടതായി റിപ്പോർട്ട്. കാബൂളിലെ മന്ത്രാലയത്തിനുള്ളിലാണ് സ്ഫോടനമുണ്ടായത്.
അഭയാർത്ഥികളിലൊരാൾ പേപ്പറുകളുമായി സഹായം തേടി മന്ത്രാലയത്തിലെത്തുകയായിരുന്നു. ഉച്ചഭക്ഷണത്തിന് ശേഷം മന്ത്രാലയ വളപ്പിലേക്ക് വരുകയായിരുന്നു ഖലീൽ. ഇതിനിടയിലാണ് സ്ഫോടനമുണ്ടായതെന്ന് ഔദ്യോഗിക വൃത്തങ്ങൾ അറിയിച്ചു. സ്ഫോടനത്തിൽ എത്ര പേർ മരിച്ചിട്ടുണ്ടെന്ന് കൃത്യമായ വിവരങ്ങൾ ലഭ്യമായിട്ടില്ല. സ്ഫോടനത്തിന്റെ ഉത്തരവാദിത്തം ആരും ഏറ്റെടുത്തിട്ടില്ല.
സുന്നി ഇസ്ലാമിസ്റ്റ് ഭീകരസംഘടനയായ ഹഖാനി നെറ്റ് വർക്കിലെ പ്രധാനിയാണ് ഖലീൽ ഉർ-റഹ്മാൻ ഹഖാനി. താലിബാനുമായി അടുത്ത ബന്ധം പുലർത്തുന്ന ഭീകരസംഘടനയുടെ സ്ഥാപകൻ ജലാലുദ്ദീൻ ഹഖാനിയുടെ സഹോദരനും ഇപ്പോഴത്തെ ആഭ്യന്തരമന്ത്രി സിറാജുദ്ദീൻ ഹഖാനിയുടെ പിതൃസഹോദരനുമായിരുന്നു കൊല്ലപ്പെട്ട മന്ത്രി. 1990-കളുടെ മധ്യത്തിൽ ഖലീൽ ഹഖാനി താലിബാനിൽ ചേർന്നു. താലിബാന് വേണ്ടി അന്താരാഷ്ട്രതലത്തിൽ ധനസമാഹരണം നടത്തിയത് ഖലീൽ ഹനാനിയായിരുന്നു. 2021-ൽ താലിബാൻ അഫ്ഗാൻ പിടിച്ചെടുത്തതോടെ ഖലീൽ ഹലാനി തലിബാൻ സർക്കാരിൽ മന്ത്രിയായി.
