തിരുവനന്തപുരം: മുഖ്യമന്ത്രി പിണറായി വിജയന്റെ വാഹനവ്യൂഹം വീണ്ടും അപകടത്തിൽപ്പെട്ടു. എംസി റോഡിൽ പള്ളിക്കലിൽ വച്ചായിരുന്നു സംഭവം. കമാൻഡോ വാഹനത്തിന് പിന്നിൽ എസ്കോട്ട് പോയ ലോക്കൽ പൊലീസിന്റെ ജീപ്പ് ഇടിക്കുകയായിരുന്നു. കടയ്‌ക്കൽ കോട്ടപ്പുറത്ത് പരിപാടി കഴിഞ്ഞതിന് ശേഷം മുഖ്യമന്ത്രി തിരിച്ചുവരുന്നതിനിടെ ഉച്ചയ്‌ക്ക് 12 മണിയോടെയായിരുന്നു അപകടം.
വെഞ്ഞാറമൂട് പൊലീസ് സ്റ്റേഷന് സമീപത്ത് വച്ചാണ് അപകടമുണ്ടായത്. സംഭവത്തിൽ ആർക്കും പരിക്കേറ്റതായി റിപ്പോർട്ടില്ല. കമാൻഡോ വാഹനത്തിന് ചെറിയ കേടുപാടുകൾ സംഭവിച്ചിട്ടുണ്ട്. അപകടമുണ്ടായി മിനിറ്റുകൾക്കുള്ളിൽ തന്നെ യാത്ര പുനരാരംഭിക്കാൻ കഴിഞ്ഞു.
രണ്ട് മാസം മുൻപ് വെഞ്ഞാറമൂട് ഭാഗത്ത് വച്ച് സമാനരീതിയിൽ അപകടം സംഭവിച്ചിരുന്നു. മുഖ്യമന്ത്രിക്ക് അകമ്പടിയായി പോയ കമാൻഡോ വാഹനങ്ങൾ ഒന്നിന് പിറകെ ഒന്നായി ഇടിക്കുകയായിരുന്നു. സംഭവത്തിൽ ആർക്കും പരിക്കില്ലെങ്കിലും വാഹനങ്ങൾക്ക് സാരമായ കേടുപാടുകൾ സംഭവിച്ചു. ഈ അപകടം നടന്ന സ്ഥലത്ത് നിന്ന് ഏകദേശം അഞ്ച് കിലോമീറ്റർ മാറിയാണ് പുതിയ അപകടം സംഭവിച്ചിരിക്കുന്നത്.
