പ്രയാഗ്‌രാജ്: മഹാ കുംഭമേളയുടെ പ്രകാശത്തിൽ ജ്വലിച്ച് നിൽക്കുന്ന പ്രയാഗ്രാജിന്റെ ബഹിരാകാശ ചിത്രം പുറത്ത് വിട്ട് നാസ ബഹിരാകാശ സഞ്ചാരി. ഡൊണാൾഡ് പെറ്റിറ്റ് പകർത്തിയ ചിത്രമാണ് പുറത്ത് വന്നത്. പ്രായാഗിന്റെ രാത്രി ദൃശ്യം അന്താരാഷ്‌ട്ര ബഹിരാകാശ നിലയത്തിൽ നിന്നാണ് ഡൊണാൾഡ് ചിത്രം എടുത്തത്.
കറുത്ത പ്രതലത്തിന്റെ മദ്ധ്യത്തിലായി തിളങ്ങി നിൽക്കുന്ന പ്രയാഗ്രാജിന്റെ രണ്ട് ചിത്രങ്ങളാണ് ഡൊണാൾഡ് സോഷ്യൽ മീഡിയയിൽ ഷെയർ ചെയ്തത്. ” 2025 മഹാകുംഭമേള, ഗംഗാനദി തീർത്ഥാടനം രാത്രിയിൽ ISS-ൽ നിന്ന്. ‘ഏറ്റവും വലിയ മനുഷ്യസംഗമം നന്നായി ജ്വലിച്ച് നിൽക്കുന്നു” എന്ന കുറിപ്പും അദ്ദേഹം നൽകിയിട്ടുണ്ട്. 69 കാരനായ ഡോണൾഡ് കെമിക്കൽ എഞ്ചിനീയർ കൂടിയാണ്. നിലവിൽ 72 സഞ്ചാരികളാണ് ബഹിരാകാശ നിലയത്തിലുള്ളത്.
2025 Maha Kumbh Mela Ganges River pilgrimage from the ISS at night. The largest human gathering in the world is well lit. pic.twitter.com/l9YD6o0Llo
— Don Pettit (@astro_Pettit) January 26, 2025
കഴിഞ്ഞ ദിവസം ഇസ്രോയും പ്രയാഗ്രാജിന്റെ സാറ്റ്ലൈറ്റ് ചിത്രം പങ്കുവെച്ചിരുന്നു. അത്യാധുനിക ഒപ്റ്റിക്കൽ ഉപഗ്രഹങ്ങളും റഡാർസാറ്റും ഉപയോഗിച്ചാണ് ഹൈദരാബാദിലെ നാഷണൽ റിമോട്ട് സെൻസിംഗ് സെൻ്റർ കുംഭമേളയുടെ ചിത്രങ്ങൾ പകർത്തിയത്. ടെന്റ് സിറ്റിയും താൽക്കാലിക പാലങ്ങളും പുതിയതായി നിർമിച്ച ശിവാലയ പാർക്കും ഇതിൽ വ്യക്തമായി കാണാം. കൂടാതെ പുതിയതായി നിർമിച്ച റോഡ് ശ്രംഖലയും ഇതിൽ പതിഞ്ഞിട്ടുണ്ട്.
ലോകത്തിലെ ഏറ്റവും വലിയ ആത്മീയ സംഗമമാണ് മഹാകുംഭമേള. സാംസ്കാരിക മന്ത്രാലയത്തിന്റെ കണക്ക് പ്രകാരം 45 കോടിയിലധികം തീർഥാടകർ ഇത്തവണ പങ്കെടുക്കും.
