ലോകത്തിലെ ഏറ്റവും ഉയരം കുറഞ്ഞ ആടെന്ന റെക്കോർഡ് നേടി ചരിത്രം സൃഷ്ടിച്ച് കേരളത്തിലെ വ്യത്യസ്ത ഇനം ആട്. കനേഡിയൻ പിഗ്മി ഇനത്തിൽപ്പെട്ട കറുത്ത പെൺ പിഗ്മി ആടാണ് ഗിന്നസ് ബുക്ക് ഓഫ് വേൾഡ് റെക്കോർഡിൽ ഇടം നേടിയ കറുമ്പി.
ഗിന്നസ് റിപ്പോർട്ട് പ്രകാരം , 2021 ൽ ജനിച്ച കറുമ്പി, നാല് വയസിൽ പൂർണ്ണ വളർച്ചയെത്തിയപ്പോൾ വെറും 1 അടി 3 ഇഞ്ച് (40.50 സെന്റീമീറ്റർ) ഉയരമാണുള്ളത്. കരുത്തുറ്റ ശരീരത്തിനും കാലുകൾ 21 ഇഞ്ചിൽ (53 സെന്റീമീറ്റർ) കൂടുതൽ ഉയരത്തിൽ വളരാത്തതുമായ ജനിതക കുള്ളൻ സ്വഭാവത്തിനും പേരുകേട്ട ഇനമാണ് കനേഡിയൻ പിഗ്മി. ഏറ്റവും ചെറിയ മൃഗമാണെങ്കിലും കറുമ്പി മറ്റുള്ളവരുമായി വളരെപ്പെട്ടന്ന് ഇടപഴകുമെന്ന് ഉടമ പീറ്റർ ലെനു പറയുന്നു.
മറ്റ് മൂന്ന് ആൺ ആടുകൾ, ഒമ്പത് പെൺ ആടുകൾ, പത്ത് കുട്ടികൾ എന്നിവരോടൊപ്പമാണ് കറുമ്പിയുടെ താമസം. ഇവ കൂടാതെ പശുക്കൾ, മുയലുകൾ, കോഴികൾ, താറാവുകൾ എന്നിവയും ലെനുവിന്റെ ഫാമിലുണ്ട്. കറുമ്പി ഇപ്പോൾ തന്റെ അടുത്ത കുഞ്ഞിനെ ഗർഭിണിയാണെന്ന സന്തോഷ വാർത്തയും ലെനു വെളിപ്പെടുത്തി. കൈവശമുള്ള എല്ലാ മൃഗങ്ങളുടെയും ജനിതക നിലവാരം നിലനിർത്താൻ പ്രത്യേക ശ്രദ്ധ ചെലുത്തുന്നുണ്ടെന്ന് അദ്ദേഹം പറഞ്ഞു.
