ആലപ്പുഴ: ആര്യാ രാജേന്ദ്രൻ ജനങ്ങളോട് ചെറുപ്പത്തിന്റെ ധാർഷ്ട്യം കാണിച്ചുവെന്ന് എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ. തിരുവനന്തപുരം നഗരസഭ ഇടതുപക്ഷത്തിന് നഷ്ടപ്പെടാൻ കാരണമായത് ജനങ്ങളോടുള്ള പെരുമാറ്റമാണെന്നും അധികാരത്തിലിരിക്കുന്നവർക്ക് വിനയമാണ് വേണ്ടതെന്നും വെള്ളാപ്പള്ളി നടേശൻ പറഞ്ഞു.
വിദ്യാഭ്യാസമുണ്ടെന്ന് പറഞ്ഞ് ആര്യാ രാജേന്ദ്രനെ എല്ലാവരും പൊക്കി. അവർ വളരെയധികം പൊങ്ങുകയും ചെയ്തു. ഈ പൊങ്ങച്ചത്തിന്റെ ദോഷം അവിടെയുണ്ടായി. ഒരു ഡ്രൈവറെ പിടിച്ചുനിർത്തി കേസെടുപ്പിച്ചില്ലേ. അധികാരത്തിന്റെ ധാർഷ്ട്യമല്ലേയിത്. അധികാരത്തിലിരിക്കുന്നവർക്ക് വിനയമല്ലേ വേണ്ടത്. ചെറുപ്പത്തിന്റെ ധാർഷ്ട്യവും അഹങ്കാരവും ചർച്ചാ വിഷയമായി.
പൊതുപ്രവർത്തനത്തിൽ ആര്യാ രാജേന്ദ്രന് പൊതുപ്രവർത്തകന്റെ ശൈല്യ ഉണ്ടായിരുന്നില്ല. ഇനിയും വളയണം. കോർപ്പറേഷൻ തെരഞ്ഞെടുപ്പിൽ ഇത് കാരണമായി. ഇടതുപക്ഷത്തിന്റെ പെരുമാറ്റവും വിനയായി. താഴേത്തട്ടിലെ നേതാക്കൾ നന്നായി പെരുമാറിയാൽ ഇതിനേക്കാൾ മെച്ചമാകും. ചിലർക്ക് മസിൽ പിടിത്തവുമുണ്ട്. പഴയ കാലമല്ലിത്, ആളുകളോട് മാന്യമായും സ്നേഹത്തോടെയും പെരുമാറണമെന്നും വെള്ളാപ്പള്ളി നടേശൻ പറഞ്ഞു.
