ടെഹ്റാൻ: ആഗോള എണ്ണവ്യാപാരത്തിന്റെ ജീവനാഡിയായ ഹോർമുസ് കടലിടുക്കിൽ ഉപരോധം ഏർപ്പെടുത്തുന്നതിന് നേതൃത്വം നൽകിയ ഇറാൻ റെവല്യൂഷണറി ഗാർഡ് കോർപ്സ് (IRGC) നാവികസേനാ മേധാവി അലിറേസ തങ്സിരി കൊല്ലപ്പെട്ടു. ദക്ഷിണ ഇറാനിലെ തുറമുഖ നഗരമായ ബന്ദർ അബ്ബാസിൽ ഇസ്രായേൽ നടത്തിയ വ്യോമാക്രമണത്തിലാണ് അദ്ദേഹം കൊല്ലപ്പെട്ടത്.
തങ്സിരിയോടൊപ്പം മറ്റ് മുതിർന്ന നാവികസേനാ ഉദ്യോഗസ്ഥരും കൊല്ലപ്പെട്ടതായി ഇസ്രായേൽ പ്രതിരോധ മന്ത്രി ഇസ്രായേൽ കാറ്റ്സ് സ്ഥിരീകരിച്ചു.
ഹോർമുസ് കടലിടുക്കിൽ മൈനുകൾ പാകിയതിനും കപ്പൽ ഗതാഗതം തടസ്സപ്പെടുത്തിയതിനും പിന്നിലെ ബുദ്ധികേന്ദ്രം തങ്സിരിയാണെന്ന് ഇസ്രായേൽ ആരോപിക്കുന്നു. ഈ കടലിടുക്ക് വീണ്ടും തുറക്കുന്നതിനുള്ള നീക്കത്തിന്റെ ഭാഗമായാണ് ആക്രമണം നടന്നത്.
ഇതിൽ ഇറാൻ ഇതുവരെ ഔദ്യോഗികമായി പ്രതികരിച്ചിട്ടില്ല. ഫെബ്രുവരിയിൽ ആരംഭിച്ച സംഘർഷത്തിന് ശേഷം ഇറാനിലെ പല ഉന്നത ഉദ്യോഗസ്ഥരും ഇസ്രായേൽ ലക്ഷ്യമാക്കിയിട്ടുണ്ട്.
