കൊച്ചി: യുവനടി നല്‍കിയ ലൈംഗികാതിക്രമ പരാതിയില്‍ അറസ്റ്റിലായ പ്രമുഖ സംവിധായകന്‍ രഞ്ജിത്തിനെ കൂടുതല്‍ ചോദ്യം ചെയ്യുന്നതിനായി പോലീസ് കസ്റ്റഡിയില്‍ വിട്ടു. എറണാകുളം ഫസ്റ്റ് ക്ലാസ് ജുഡീഷ്യല്‍ മജിസ്ട്രേറ്റ് കോടതിയാണ് പ്രതിയെ മൂന്ന് ദിവസത്തേക്ക് പ്രത്യേക അന്വേഷണ സംഘത്തിന്റെ കസ്റ്റഡിയില്‍ വിട്ടത്. ഇതോടൊപ്പം രഞ്ജിത്ത് സമര്‍പ്പിച്ച ജാമ്യാപേക്ഷ കോടതി ചൊവ്വാഴ്ച പരിഗണിക്കാന്‍ മാറ്റിവെച്ചു.
കഴിഞ്ഞ ചൊവ്വാഴ്ച തൊടുപുഴയില്‍ വെച്ച് അറസ്റ്റിലായ രഞ്ജിത്തിനെ അന്ന് തന്നെ 14 ദിവസത്തേക്ക് റിമാന്‍ഡ് ചെയ്ത് എറണാകുളം സബ് ജയിലിലേക്ക് അയച്ചിരുന്നു. എന്നാല്‍, പരാതിയില്‍ പറയുന്ന കാര്യങ്ങളില്‍ കൂടുതല്‍ വ്യക്തത വരുത്തുന്നതിനും തെളിവുകള്‍ ശേഖരിക്കുന്നതിനുമായി പ്രതിയെ കസ്റ്റഡിയില്‍ വേണമെന്ന പോലീസിന്റെ ആവശ്യം കോടതി അംഗീകരിക്കുകയായിരുന്നു.
സംഭവം നടന്നുവെന്ന് പറയുന്ന എറണാകുളത്തെയും കോട്ടയത്തെയും സിനിമാ ലൊക്കേഷനുകളിലും, പ്രത്യേകിച്ച് പരാതിയില്‍ പരാമര്‍ശിക്കുന്ന കാരവനിലും എത്തിച്ച് വരും ദിവസങ്ങളില്‍ തെളിവെടുപ്പ് നടത്തും. അറസ്റ്റ് സമയത്ത് ആരോഗ്യപ്രശ്‌നങ്ങള്‍ ഉണ്ടായിരുന്നതിനാല്‍ വിശദമായ ചോദ്യം ചെയ്യല്‍ അന്ന് പൂര്‍ത്തിയാക്കാന്‍ കഴിഞ്ഞിരുന്നില്ലെന്ന് പോലീസ് കോടതിയെ അറിയിച്ചു.
രഞ്ജിത്തിന്റെ ജാമ്യാപേക്ഷയില്‍ ഇന്ന് വാദം നടന്നെങ്കിലും, കസ്റ്റഡി കാലാവധി പൂര്‍ത്തിയാകാത്ത സാഹചര്യത്തില്‍ വിധി പറയുന്നത് ചൊവ്വാഴ്ചത്തേക്ക് മാറ്റുകയായിരുന്നു. കസ്റ്റഡിയില്‍ വിടുന്നതിനെ പ്രതിഭാഗം ശക്തമായി എതിര്‍ത്തെങ്കിലും അന്വേഷണത്തിന്റെ പ്രാധാന്യം കണക്കിലെടുത്ത് കോടതി പോലീസിനൊപ്പം നിന്നു. വിവാദങ്ങളെത്തുടര്‍ന്ന് പഴയ അഭിഭാഷകന്‍ വക്കാലത്ത് ഒഴിഞ്ഞതിനാല്‍ പുതിയ അഭിഭാഷകനാണ് ഇന്ന് രഞ്ജിത്തിന് വേണ്ടി ഹാജരായത്.
കഴിഞ്ഞ ജനുവരിയില്‍ സിനിമയുടെ ചിത്രീകരണത്തിനിടെ കാരവനില്‍ വെച്ച് രഞ്ജിത്ത് തന്നെ ലൈംഗികമായി പീഡിപ്പിക്കാന്‍ ശ്രമിച്ചു എന്നാണ് യുവനടിയുടെ പരാതി. നടി കരഞ്ഞുകൊണ്ട് കാരവനില്‍ നിന്ന് ഇറങ്ങിപ്പോകുന്നത് കണ്ടവരുണ്ടെന്ന് കൊച്ചി സിറ്റി പോലീസ് കമ്മിഷണര്‍ വ്യക്തമാക്കിയിരുന്നു. ഈ സാക്ഷികളുടെ മൊഴികളും അന്വേഷണസംഘം വിശദമായി പരിശോധിച്ചുവരികയാണ്. എസിപി അശ്വതി ജിജിയുടെ നേതൃത്വത്തിലുള്ള സംഘമാണ് കേസ് അന്വേഷിക്കുന്നത്.
