ബ്രസീലിയ: തെക്കന് ബ്രസീലിയന് സംസ്ഥാനമായ റിയോ ഗ്രാന്ഡെ ഡോ സുളില് വിമാനം റസ്റ്ററന്റിന് മുകളിലേക്ക് തകര്ന്നു വീണ് നാല് പേര് കൊല്ലപ്പെട്ടു. വിമാനത്തിലുണ്ടായിരുന്ന പൈലറ്റും മൂന്ന് യാത്രക്കാരുമാണ് മരിച്ചത്. വിമാനം തകര്ന്നുവീണയുടന് തീപിടിച്ചെങ്കിലും, അപകടസമയത്ത് റസ്റ്ററന്റ് അടഞ്ഞുകിടന്നിരുന്നതിനാല് വന് ദുരന്തം ഒഴിവായി.
പ്രാദേശിക സമയം രാവിലെ 10.30 ഓടെയായിരുന്നു അപകടം. കാപ്പാവോ ഡാ കനോവ വിമാനത്താവളത്തില് ലാന്ഡിംഗിന് ശ്രമിക്കുന്നതിനിടെ വിമാനം നിയന്ത്രണം വിട്ട് റണ്വേയ്ക്ക് സമീപമുള്ള വൈദ്യുത തൂണിലിടിക്കുകയായിരുന്നു. തുടര്ന്ന് സമീപത്തെ ജനവാസ മേഖലയിലുള്ള റസ്റ്ററന്റിലേക്ക് വിമാനം പതിച്ചു.
വിമാനം വീഴുമ്പോള് റസ്റ്ററന്റിന് സമീപമുണ്ടായിരുന്ന രണ്ട് പേര് അത്ഭുതകരമായി രക്ഷപ്പെട്ടു. ഇതിന്റെ ദൃശ്യങ്ങള് പുറത്തുവന്നിട്ടുണ്ട്. റസ്റ്ററന്റിന് പുറമെ സമീപത്തെ ഒരു കടയ്ക്കും കേടുപാടുകള് സംഭവിച്ചു. പ്രദേശം കറുത്ത പുകയാല് മൂടപ്പെട്ടതിനെ തുടര്ന്ന് സിവില് ഡിഫന്സ് സംഘം സ്ഥലത്തെത്തി ആളുകളെ ഒഴിപ്പിച്ചു. ‘സ്ഥിതിഗതികള് സൂക്ഷ്മമായി നിരീക്ഷിച്ചു വരികയാണെന്നും സുരക്ഷാ സേനയ്ക്ക് ആവശ്യമായ നിര്ദ്ദേശങ്ങള് നല്കിയിട്ടുണ്ടെന്നും’ സംസ്ഥാന ഗവര്ണര് എഡ്വേര്ഡോ ലൈറ്റ് അറിയിച്ചു.
അടുത്തടുത്ത ദിവസങ്ങളില് നടക്കുന്ന രണ്ടാമത്തെ വിമാനാപകടമാണിത്. കഴിഞ്ഞ 24 മണിക്കൂറിനുള്ളില് മധ്യ മെക്സിക്കോയിലെ പ്യൂബ്ല നഗരത്തിന് സമീപം നടന്ന മറ്റൊരു വിമാനാപകടത്തിലും നാല് പേര് കൊല്ലപ്പെട്ടിരുന്നു. ഈ നടുക്കം മാറും മുന്പേയാണ് ബ്രസീലിലും സമാനമായ ദുരന്തം ആവര്ത്തിച്ചിരിക്കുന്നത്.
