പട്ന: പശ്ചിമേഷ്യന് സംഘര്ഷം പരിഹരിക്കാന് അമേരിക്കയും ഇറാനും തമ്മില് ഇസ്ലാമാബാദ് വഴി ചര്ച്ചകള് നടക്കുന്നുവെന്ന വാര്ത്തകള് അടിസ്ഥാനരഹിതമാണെന്ന് ഇറാന് പരമോന്നത നേതാവിന്റെ ഇന്ത്യയിലെ പ്രതിനിധി അബ്ദുള് മജിദ് ഹക്കീം ഇലാഹി വെളിപ്പെടുത്തി. വാര്ത്താ ഏജന്സിയായ എഎന്ഐക്ക് നല്കിയ പ്രത്യേക അഭിമുഖത്തിലാണ് അദ്ദേഹം പാകിസ്ഥാന്റെ വാദങ്ങളെ തള്ളിയത്.
ചര്ച്ചകളില് പാകിസ്ഥാന് യാതൊരുവിധ പങ്കുമില്ലെന്ന് ഇലാഹി വ്യക്തമാക്കി. ആഗോള എണ്ണവിലയില് സ്വാധീനം ചെലുത്താനും തങ്ങള്ക്കും നിര്ണ്ണായക പങ്കുണ്ടെന്ന് വരുത്തിത്തീര്ക്കാനുമാണ് പാകിസ്ഥാന് ഇത്തരം വ്യാജ പ്രചാരണങ്ങള് നടത്തുന്നത്. ‘ചര്ച്ചകള്ക്കോ ഒത്തുതീര്പ്പുകള്ക്കോ പാകിസ്ഥാന് ഒട്ടും ഗൗരവമില്ല. വെറുതെ വാക്കുകള് കൊണ്ട് അന്തരീക്ഷം സൃഷ്ടിച്ച് എണ്ണവില പിടിച്ചുനിര്ത്താനാണ് അവര് ശ്രമിക്കുന്നത്. ചില രാജ്യങ്ങളെ തങ്ങളുടെ താല്പ്പര്യങ്ങള്ക്കായി ഉപയോഗിക്കുക എന്നതിനപ്പുറം സമാധാന ശ്രമങ്ങളില് അവര്ക്ക് സത്യസന്ധതയില്ല,’ – അബ്ദുള് മജിദ് ഹക്കീം ഇലാഹി.
പശ്ചിമേഷ്യയിലെ നിലവിലെ സംഘര്ഷാവസ്ഥയ്ക്ക് പരിഹാരം കാണാന് ഇന്ത്യ ഉള്പ്പെടെയുള്ള രാജ്യങ്ങള്ക്ക് വലിയ സംഭാവനകള് നല്കാന് കഴിയുമെന്ന് അദ്ദേഹം പ്രത്യാശ പ്രകടിപ്പിച്ചു. സമാധാന ചര്ച്ചകളില് ഇന്ത്യയുടെ ഇടപെടലിനെ ഇറാന് സ്വാഗതം ചെയ്യുന്നതായും അദ്ദേഹം സൂചിപ്പിച്ചു. മുന് ഇറാന് പരമോന്നത നേതാവ് അലി ഖമനയിയുടെ അനുശോചന ചടങ്ങുകളില് പങ്കെടുക്കാനാണ് ഇലാഹി നിലവില് പട്നയിലെത്തിയത്. അന്താരാഷ്ട്ര തലത്തില് ഇറാനും അമേരിക്കയും തമ്മിലുള്ള ബന്ധം വഷളായിരിക്കുന്ന സാഹചര്യത്തില്, പാകിസ്ഥാന്റെ മധ്യസ്ഥ ശ്രമങ്ങളെ ഔദ്യോഗികമായി തള്ളിക്കളയുന്നതാണ് അദ്ദേഹത്തിന്റെ പ്രസ്താവന.
പാകിസ്ഥാന് വഴി യാതൊരുവിധ സന്ദേശക്കൈമാറ്റവും അമേരിക്കയുമായി നടന്നിട്ടില്ലെന്ന് വ്യക്തമാക്കുന്നതോടെ, മേഖലയിലെ നയതന്ത്ര നീക്കങ്ങളില് പുതിയ ചര്ച്ചകള്ക്ക് വഴിതുറന്നിരിക്കുകയാണ്.
