തിരുവനന്തപുരം: സംസ്ഥാനത്തിന്റെ വിവിധ ഭാഗങ്ങളില് വരും മണിക്കൂറുകളിലും വരും ദിവസങ്ങളിലും ശക്തമായ വേനല് മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു. കൊല്ലം, പത്തനംതിട്ട, ഇടുക്കി ജില്ലകളില് അടുത്ത മൂന്ന് മണിക്കൂറിനുള്ളില് ഇടിമിന്നലോടു കൂടിയ മഴയ്ക്കും മണിക്കൂറില് 40 കിലോമീറ്റര് വേഗതയിലുള്ള കാറ്റിനും സാധ്യതയുണ്ട്. ഏപ്രില് 9 മുതല് 11 വരെ കേരളത്തിലുടനീളം ഒറ്റപ്പെട്ടയിടങ്ങളില് ഇടിമിന്നലോട് കൂടിയ മഴ തുടരാന് സാധ്യതയുള്ളതിനാല് പൊതുജനങ്ങള് പ്രത്യേക ജാഗ്രത പാലിക്കണമെന്ന് അധികൃതര് നിര്ദ്ദേശിച്ചു.
മനുഷ്യജീവനും വൈദ്യുത ഉപകരണങ്ങള്ക്കും വലിയ ഭീഷണിയുയര്ത്തുന്ന ഒന്നാണ് ഇടിമിന്നല്. കാര്മേഘങ്ങള് കണ്ടുതുടങ്ങുന്ന സമയം മുതല് തന്നെ താഴെ പറയുന്ന മുന്കരുതലുകള് സ്വീകരിക്കണം. സുരക്ഷിത സ്ഥാനങ്ങളിലേക്ക് മാറുക: ഇടിമിന്നലിന്റെ ലക്ഷണങ്ങള് കണ്ടാലുടന് തുറസായ സ്ഥലങ്ങളില് നിന്ന് മാറി സുരക്ഷിതമായ കെട്ടിടത്തിനുള്ളില് അഭയം തേടുക. ജനലുകളും വാതിലുകളും കൃത്യമായി അടച്ചിടണം. ഇടിമിന്നലുള്ള സമയത്ത് ഗൃഹോപകരണങ്ങളുടെ വൈദ്യുതി ബന്ധം വിച്ഛേദിക്കുക. ഫോണ് ഉപയോഗം (ലാന്ഡ്ലൈന്) ഒഴിവാക്കുക. എന്നാല് മൊബൈല് ഫോണ് ഉപയോഗിക്കുന്നത് അപകടകരമല്ല.
അന്തരീക്ഷം മേഘാവൃതമാണെങ്കില് ടെറസിലോ മൈതാനങ്ങളിലോ കളിക്കുന്നത് ഒഴിവാക്കണം. മരച്ചുവട്ടില് നില്ക്കുന്നതും വാഹനം പാര്ക്ക് ചെയ്യുന്നതും അപകടം ക്ഷണിച്ചുവരുത്തും. യാത്രക്കാര്ക്കുള്ള നിര്ദ്ദേശം: കാറിനുള്ളിലോ മറ്റ് അടഞ്ഞ വാഹനങ്ങള്ക്കുള്ളിലോ ഉള്ളവര് അതിനുള്ളില് തന്നെ തുടരുന്നതാണ് സുരക്ഷിതം. എന്നാല് സൈക്കിള്, ബൈക്ക്, ട്രാക്ടര് എന്നിവയില് യാത്ര ചെയ്യുന്നവര് ഉടന് തന്നെ യാത്ര നിര്ത്തി സുരക്ഷിതമായ കെട്ടിടങ്ങളിലേക്ക് മാറണം. അപ്രതീക്ഷിതമായി എത്തുന്ന വേനല് മഴയോടൊപ്പം ഉണ്ടാകുന്ന കാറ്റിലും മിന്നലിലും അപകടങ്ങള് സംഭവിക്കാതിരിക്കാന് കാലാവസ്ഥാ വകുപ്പിന്റെ നിര്ദ്ദേശങ്ങള് കര്ശനമായി പാലിക്കണമെന്ന് ദുരന്തനിവാരണ അതോറിറ്റിയും അറിയിച്ചു.
