ബെംഗളൂരു: കര്‍ണാടകയിലെ ട്രെക്കിങ് പാതകളില്‍ മലയാളി സഞ്ചാരികള്‍ അപകടത്തില്‍പ്പെടുന്ന സാഹചര്യം പതിവായതോടെ, സുരക്ഷാ സംവിധാനങ്ങള്‍ അടിയന്തരമായി പരിഷ്‌കരിക്കാന്‍ വനംവകുപ്പിന് നിര്‍ദ്ദേശം. വനംമന്ത്രി ഈശ്വര്‍ ബി. ഖന്ദ്രെയാണ് ഇത് സംബന്ധിച്ച കര്‍ശന നടപടികള്‍ പ്രഖ്യാപിച്ചത്. ട്രെക്കിങ്ങിന് എത്തുന്നവരുടെ ലൊക്കേഷന്‍ കൃത്യമായി മനസ്സിലാക്കാന്‍ സഹായിക്കുന്ന പ്രത്യേക മൊബൈല്‍ ആപ്പ് വനംവകുപ്പ് വികസിപ്പിക്കും. വനത്തിനുള്ളില്‍ വഴിതെറ്റുന്നവരെ വേഗത്തില്‍ കണ്ടെത്താന്‍ ഈ ആപ്പ് സഹായിക്കും.
സാഹസിക യാത്രയ്‌ക്ക് എത്തുന്നവര്‍ക്ക് നിര്‍ബന്ധിത ഗ്രൂപ്പ് ഇന്‍ഷുറന്‍സ് പരിരക്ഷ ഏര്‍പ്പെടുത്തും. സഞ്ചാരികളെ അനുഗമിക്കുന്ന ഗൈഡുകള്‍ക്ക് വയര്‍ലെസ് കമ്മ്യൂണിക്കേഷന്‍ സെറ്റുകള്‍ നല്‍കും. യാത്രക്കാരുടെ സുരക്ഷ ഉറപ്പാക്കുന്നതില്‍ ഇവര്‍ക്ക് പൂര്‍ണ്ണ ഉത്തരവാദിത്തമുണ്ടായിരിക്കും. ട്രെക്കിങ് കേന്ദ്രങ്ങളില്‍ നിന്ന് ഫീസ് ഈടാക്കുന്നുണ്ടെങ്കിലും മതിയായ സൗകര്യങ്ങളില്ലെന്ന പരാതി പരിഹരിക്കാന്‍ മന്ത്രി നിര്‍ദ്ദേശം നല്‍കി.
കഴിഞ്ഞ ദിവസങ്ങളില്‍ കുടക് തടിയന്‍ഡമോള്‍ മലയില്‍ മലയാളി യുവതി ശരണ്യയെ കാണാതായതും, ചിക്കമഗളൂരുവില്‍ പതിനഞ്ചുകാരിയായ മലയാളി വിദ്യാര്‍ത്ഥിനി ശ്രീനന്ദയ്‌ക്ക് വേണ്ടിയുള്ള തിരച്ചില്‍ തുടരുന്നതുമാണ് സര്‍ക്കാരിനെ പെട്ടെന്നുള്ള നടപടികള്‍ക്ക് പ്രേരിപ്പിച്ചത്. സുരക്ഷാ ക്രമീകരണങ്ങള്‍ വിലയിരുത്തുന്നതിന്റെ ഭാഗമായി തടിയന്‍ഡമോള്‍ മലയിലെ ട്രെക്കിങ് പാതകള്‍ ഏപ്രില്‍ 11 വരെ താല്‍ക്കാലികമായി അടച്ചിരിക്കുകയാണ്.
കര്‍ണാടക വനംവകുപ്പ് ചീഫ് വൈല്‍ഡ് ലൈഫ് വാര്‍ഡനോട് സുരക്ഷാ പ്രോട്ടോക്കോള്‍ സംബന്ധിച്ച വിശദമായ റിപ്പോര്‍ട്ട് സമര്‍പ്പിക്കാനും മന്ത്രി ആവശ്യപ്പെട്ടു. യാത്രക്കാരുടെ സുരക്ഷയില്‍ വിട്ടുവീഴ്ചയുണ്ടാകില്ലെന്ന് മന്ത്രാലയം വ്യക്തമാക്കി.
