തിരുവനന്തപുരം/കുന്നംകുളം: കുംഭമേളയിലൂടെ ശ്രദ്ധേയയായ പെണ്കുട്ടിയുടെ വിവാഹവുമായി ബന്ധപ്പെട്ട വിവാദം രാഷ്ട്രീയ പോരിലേക്കും നിയമ നടപടികളിലേക്കും നീങ്ങുന്നു. പ്രായപൂര്ത്തിയാകാത്ത പെണ്കുട്ടിയെ വിവാഹം കഴിപ്പിക്കാന് കൂട്ടുനിന്നു എന്നാരോപിച്ച് സി.പി.എം സംസ്ഥാന സെക്രട്ടറി എം.വി. ഗോവിന്ദന്, മന്ത്രി വി. ശിവന്കുട്ടി, എ.എ. റഹീം എം.പി എന്നിവര്ക്കെതിരെ കേസെടുക്കണമെന്ന ആവശ്യവുമായി കോണ്ഗ്രസ് രംഗത്തെത്തി.
കോണ്ഗ്രസ് പ്രാദേശിക നേതാവ് വിഘ്നേശ്വര പ്രസാദ് കുന്നംകുളം പോലീസിലാണ് പരാതി നല്കിയത്. പോക്സോ, ശൈശവ വിവാഹ നിരോധന നിയമം എന്നിവ പ്രകാരം കേസെടുക്കണമെന്നാണ് ആവശ്യം. തിരുവനന്തപുരത്ത് നടന്ന വിവാഹ ചടങ്ങില് പങ്കെടുത്ത ഉന്നത നേതാക്കള് പെണ്കുട്ടിയുടെ പ്രായം പരിശോധിക്കുന്നതില് ബോധപൂര്വം വീഴ്ച വരുത്തിയെന്നും നിയമവിരുദ്ധമായ ചടങ്ങിന് കാര്മ്മികത്വം വഹിച്ചെന്നുമാണ് പരാതിയിലെ പ്രധാന ആരോപണം.
വിവാഹവുമായി ബന്ധപ്പെട്ട് പെണ്കുട്ടിയുടെ ഭര്ത്താവിനെതിരെ നിലവില് കേസുണ്ട്. എന്നാല് ഇതില് കൂടുതല് വകുപ്പുകള് ചേര്ക്കണമെന്ന് പട്ടികജാതി കമ്മീഷന് നിയമോപദേശകന് പ്രകാശ് ഉയ്ക്കെ നിര്ദ്ദേശിച്ചു. വയസ്സ് തെളിയിക്കാന് വ്യാജരേഖകള് ഉപയോഗിച്ചിട്ടുണ്ടോ എന്ന് പരിശോധിക്കണം. വിവാഹത്തിന് പിന്നില് കൃത്യമായ ഗൂഢാലോചന നടന്നിട്ടുണ്ട്. വിവാഹം നടത്തിക്കൊടുത്തവരെയും പ്രതിപ്പട്ടികയില് ഉള്പ്പെടുത്താന് പോലീസിന് നിര്ദ്ദേശം നല്കുമെന്നും അദ്ദേഹം വ്യക്തമാക്കി.
വിവാദങ്ങള്ക്കിടെ സി.പി.എം നേതാക്കളെ പിന്തുണച്ച് പാര്ട്ടി പൊളിറ്റ് ബ്യൂറോ അംഗം എം.എ. ബേബി രംഗത്തെത്തി. നേതാക്കള്ക്ക് സ്വയംവിമര്ശനം നടത്തേണ്ട സാഹചര്യമില്ലെന്ന് അദ്ദേഹം പറഞ്ഞു. വിവാഹത്തിന് നേതൃത്വം നല്കിയവര്ക്കെതിരെ കര്ശന നടപടി വേണമെന്ന് ആവശ്യപ്പെട്ട് പരാതിക്കാരനായ പ്രഥം ദുബൈയും രംഗത്തെത്തിയിട്ടുണ്ട്. സംഭവത്തില് രാഷ്ട്രീയ ഗൂഢാലോചന ഉണ്ടോ എന്ന കാര്യവും പോലീസ് അന്വേഷിക്കുന്നുണ്ട്. വരും ദിവസങ്ങളില് കൂടുതല് നേതാക്കളെ ചോദ്യം ചെയ്യേണ്ടി വരുമെന്നാണ് സൂചന.
