ലണ്ടന്‍: ഇന്ത്യയും പാകിസ്താനും തമ്മിലുള്ള ക്രിക്കറ്റ് ബന്ധം അടുത്ത കാലത്തൊന്നും പുനരാരംഭിക്കാന്‍ സാധ്യതയില്ലെന്ന് മുന്‍ ഐപിഎല്‍ ചെയര്‍മാന്‍ ലളിത് മോദി. പാകിസ്താന്‍ ക്രിക്കറ്റ് ബോര്‍ഡിലെ (പിസിബി) അമിതമായ രാഷ്ട്രീയ ഇടപെടലുകളാണ് ഇതിന് പ്രധാന തടസ്സമെന്ന് അദ്ദേഹം ചൂണ്ടിക്കാട്ടി. ഒരു നിഷ്പക്ഷ വേദിയില്‍ പോലും ഇരുരാജ്യങ്ങളും തമ്മിലുള്ള മത്സരം നടക്കാനുള്ള സാധ്യത കുറവാണെന്ന് മോദി വിലയിരുത്തുന്നു.
ക്രിക്കറ്റ് ബോര്‍ഡുകള്‍ സ്വതന്ത്രമായല്ല പ്രവര്‍ത്തിക്കുന്നതെന്നും പുറത്തുനിന്നുള്ള സമ്മര്‍ദ്ദങ്ങള്‍ കാര്യങ്ങളെ രാഷ്‌ട്രീയവല്‍ക്കരിക്കുകയാണെന്നും ലളിത് മോദി പറഞ്ഞു. പിസിബിയിലെ ഭരണപരമായ തീരുമാനങ്ങളില്‍ രാഷ്ട്രീയ സ്വാധീനം വര്‍ദ്ധിക്കുന്നത് ആശങ്കാജനകമാണ്. പാകിസ്താന്‍ ക്രിക്കറ്റ് ബോര്‍ഡ് സ്വതന്ത്രമായി നിലകൊള്ളുകയായിരുന്നുവെങ്കില്‍ ചര്‍ച്ചകളില്‍ പുരോഗതി ഉണ്ടാകുമായിരുന്നുവെന്നും അദ്ദേഹം കൂട്ടിച്ചേര്‍ത്തു.
‘പാകിസ്താന്‍ ക്രിക്കറ്റ് ബോര്‍ഡിലെ രാഷ്‌ട്രീയവല്‍ക്കരണം കാരണം വരുംഭാവിയില്‍ ഒരു ഉഭയകക്ഷി പരമ്പര നടക്കാന്‍ സാധ്യതയില്ലെന്ന് ഞാന്‍ ഭയപ്പെടുന്നു. നിര്‍ഭാഗ്യവശാല്‍ അതാണ് ഇന്നത്തെ സാഹചര്യം.’ – ലളിത് മോദി പറഞ്ഞു. ഇന്ത്യ-പാക് മത്സരങ്ങളുമായി ബന്ധപ്പെട്ട വൈകാരികമായ അന്തരീക്ഷത്തില്‍ കളിക്കാരുടെ സുരക്ഷയെക്കുറിച്ചും മോദി ആശങ്ക പങ്കുവെച്ചു. ‘ഐപിഎല്ലിലേക്ക് പാക് താരങ്ങളെ കൊണ്ടുവന്നത് ഞാനാണ്. എന്നാല്‍ മുംബൈയിലെ 26/11 ഭീകരാക്രമണത്തിന് ശേഷം അവര്‍ക്ക് മടങ്ങേണ്ടി വന്നു. രാഷ്ട്രീയ തലത്തിലുള്ള സംഘര്‍ഷങ്ങള്‍ വര്‍ദ്ധിക്കുകയല്ലാതെ കുറയുന്നില്ല. ഇത് കളിക്കാരെ സംബന്ധിച്ചിടത്തോളം വലിയ വെല്ലുവിളിയാണ്,’ അദ്ദേഹം പറഞ്ഞു.
2012-13 സീസണിലാണ് ഇന്ത്യയും പാകിസ്താനും തമ്മില്‍ അവസാനമായി ഒരു ഉഭയകക്ഷി പരമ്പര കളിച്ചത്. അന്ന് പാകിസ്താന്‍ ടീം പരിമിത ഓവര്‍ മത്സരങ്ങള്‍ക്കായി ഇന്ത്യ സന്ദര്‍ശിച്ചിരുന്നു. രണ്ട് ടി20 മത്സരങ്ങള്‍ ഉള്‍പ്പെട്ട പരമ്പര 1-1 ന് സമനിലയില്‍ കലാശിച്ചപ്പോള്‍, ഏകദിന പരമ്പര പാകിസ്താന്‍ 2-1 ന് സ്വന്തമാക്കി. അതിനുശേഷം ഏഷ്യാ കപ്പിലും ഐസിസി ടൂര്‍ണമെന്റുകളിലും മാത്രമാണ് ഇരു ടീമുകളും ഏറ്റുമുട്ടുന്നത്.
