ന്യൂഡല്ഹി: ഭാരതീയ സ്ത്രീശക്തിയുടെ രാഷ്ട്രീയ മുന്നേറ്റത്തിന് വഴിയൊരുക്കുന്ന വനിതാ സംവരണ ബില്ലില് നിര്ണ്ണായക പ്രഖ്യാപനവുമായി കേന്ദ്ര ആഭ്യന്തരമന്ത്രി അമിത് ഷാ. 2029-ലെ പൊതുതിരഞ്ഞെടുപ്പോടെ രാജ്യത്ത് വനിതാ സംവരണം പൂര്ണ്ണമായും യാഥാര്ത്ഥ്യമാക്കുകയാണ് എന്ഡിഎ സര്ക്കാരിന്റെ ലക്ഷ്യമെന്ന് അദ്ദേഹം ലോക്സഭയില് വ്യക്തമാക്കി. ബില്ലിന്മേലുള്ള ചര്ച്ചകള്ക്ക് മറുപടി പറയുകയായിരുന്നു അദ്ദേഹം.
സ്ത്രീ ശാക്തീകരണമെന്നത് കേവലം മുദ്രാവാക്യമല്ല, മറിച്ച് സര്ക്കാരിന്റെ പ്രഖ്യാപിത ലക്ഷ്യമാണെന്ന് അമിത് ഷാ ചൂണ്ടിക്കാട്ടി. സംവരണം നടപ്പിലാക്കാന് സര്ക്കാര് ആത്മാര്ത്ഥമായി ശ്രമിക്കുമ്പോള് പ്രതിപക്ഷം അതിനെ തടസ്സപ്പെടുത്താനാണ് ശ്രമിക്കുന്നതെന്നും അദ്ദേഹം വിമര്ശിച്ചു. 2029-ലെ തിരഞ്ഞെടുപ്പില് സ്ത്രീകള്ക്ക് അര്ഹമായ പ്രാതിനിധ്യം ഉറപ്പാക്കിക്കൊണ്ട് സംവരണം നടപ്പിലാക്കും.
സംവരണം എന്ന മഹത്തായ തത്വത്തെ ഉപാധികള് നിരത്തി എതിര്ക്കുന്ന പ്രതിപക്ഷ നിലപാട് സ്ത്രീവിരുദ്ധമാണ്. പതിറ്റാണ്ടുകളായി മുടങ്ങിക്കിടന്ന സ്ത്രീ ശാക്തീകരണ നടപടികള് നരേന്ദ്ര മോദി സര്ക്കാരിന്റെ ഇച്ഛാശക്തിയിലൂടെ പൂര്ത്തിയാക്കും. ലോക്സഭയിലെ ചര്ച്ചകള് പൂര്ത്തിയായാലുടന് ബില്ലില് വോട്ടെടുപ്പ് നടക്കും. ഭരണഘടന ഭേദഗതിയായതിനാല് സഭയില് ഹാജരായ അംഗങ്ങളില് മൂന്നില് രണ്ട് ഭൂരിപക്ഷം ബില്ല് പാസാക്കാന് ആവശ്യമാണ്.
രാജ്യം ഉറ്റുനോക്കുന്ന ഈ നിയമനിര്മ്മാണത്തിലൂടെ പാര്ലമെന്റിലും നിയമസഭകളിലും സ്ത്രീകള്ക്ക് 33 ശതമാനം സീറ്റുകള് ഉറപ്പാക്കപ്പെടും. അനാവശ്യ വിവാദങ്ങള് ഒഴിവാക്കി സ്ത്രീകളുടെ അവകാശങ്ങള്ക്കായി എല്ലാ പാര്ട്ടികളും ഒന്നിച്ച് നില്ക്കണമെന്നും ചര്ച്ചയുടെ അവസാനം ആഭ്യന്തരമന്ത്രി ആഹ്വാനം ചെയ്തു.
