ന്യൂഡല്ഹി: ശബരിമലയിലെ സ്ത്രീ പ്രവേശനവുമായി ബന്ധപ്പെട്ട പുനഃപരിശോധനാ ഹര്ജികളില് സുപ്രീം കോടതി ഭരണഘടനാ ബെഞ്ച് സുപ്രധാനമായ നിരീക്ഷണങ്ങള് നടത്തി. മതപരമായ ആചാരങ്ങളെ ചോദ്യം ചെയ്യാന് യഥാര്ത്ഥ വിശ്വാസികള് മുതിരില്ലെന്നും, വിശ്വാസമില്ലാത്തവര്ക്ക് ഇത്തരം കാര്യങ്ങളില് ഇടപെടാന് അധികാരമില്ലെന്നും ജസ്റ്റിസ് ബി.വി. നാഗരത്ന വ്യക്തമാക്കി.
യുവതി പ്രവേശനത്തിനായി ആദ്യം കോടതിയെ സമീപിച്ചവര് യഥാര്ത്ഥ അയ്യപ്പ വിശ്വാസികളാണോ എന്ന് ജസ്റ്റിസ് നാഗരത്ന സംശയം പ്രകടിപ്പിച്ചു. പ്രത്യേക അജണ്ടകളുമായി എത്തുന്നവരുടെ പൊതുതാല്പര്യ ഹര്ജികള് കോടതി സ്വീകരിക്കരുതായിരുന്നുവെന്നും, ഏതെങ്കിലും ഒരു അയ്യപ്പ വിശ്വാസിയായ സ്ത്രീ പ്രവേശനത്തിനായി ഹര്ജി നല്കിയിട്ടുണ്ടോ എന്നും കോടതി ചോദിച്ചു.
ചില ആചാരങ്ങള് അന്ധവിശ്വാസമാണോ എന്ന് തീരുമാനിക്കാന് കോടതിക്ക് അധികാരമുണ്ടെന്ന് ചീഫ് ജസ്റ്റിസ് ഡി.വൈ. ചന്ദ്രചൂഡ് നിരീക്ഷിച്ചു. എന്നാല്, മനുഷ്യബലി പോലുള്ള ക്രിമിനല് സ്വഭാവമുള്ള കൃത്യങ്ങള് നടക്കുമ്പോള് മാത്രമേ കോടതിക്ക് നേരിട്ട് ഇടപെടാന് സാധിക്കൂ എന്നും അദ്ദേഹം കൂട്ടിച്ചേര്ത്തു. ഒരു മതാചാരം പൊതുസമാധാനത്തെയോ സാമൂഹിക നൈതികതയയോ ബാധിക്കുന്നുണ്ടെങ്കില് മാത്രമേ നീതിന്യായ വ്യവസ്ഥയ്ക്ക് അതില് ഇടപെടാന് സാധിക്കൂ എന്ന് ജസ്റ്റിസ് നാഗരത്നയും വ്യക്തമാക്കി.
ശബരിമല തന്ത്രി കണ്ഠരര് രാജീവരര്ക്ക് വേണ്ടി ഹാജരായ അഭിഭാഷകന്റെ വാദത്തിനിടെയാണ് ബെഞ്ച് ഈ പരാമര്ശങ്ങള് നടത്തിയത്. കേന്ദ്ര സര്ക്കാരും വിഷയത്തില് ശക്തമായ നിലപാട് സ്വീകരിച്ചു. ഒരു പ്രത്യേക മതാചാരത്തെ മാത്രം അന്ധവിശ്വാസമായി മുദ്രകുത്താന് കോടതിക്ക് കഴിയില്ല. അത്തരം കാര്യങ്ങളില് വിധി പറയാനുള്ള പണ്ഡിത പരിജ്ഞാനം കോടതികള്ക്കില്ല. ക്ഷേത്രങ്ങളിലെ പൂജാരിമാരുടെ നിയമനം യോഗ്യതയുടെ അടിസ്ഥാനത്തിലാണ്, അതില് സര്ക്കാരുകള് ഇടപെടുന്നത് ശരിയല്ല.
മതപരമായ കാര്യങ്ങളില് അവസാന വാക്ക് നിയമസഭയുടേതാണെന്ന വാദത്തെ കോടതി തള്ളിക്കളഞ്ഞു. മതാചാരങ്ങളും ഭരണഘടനാപരമായ ധാര്മ്മികതയും തമ്മിലുള്ള സങ്കീര്ണ്ണമായ വിഷയങ്ങളില് വിശദമായ വാദമാണ് ബെഞ്ചില് നടക്കുന്നത്.
