തിരുവനന്തപുരം : ചൂട് കൂടുന്ന സാഹചര്യത്തിൽ സ്ഥിതിഗതികൾ വിലയിരുത്തുന്നതിനായി മുഖ്യമന്ത്രി ഉന്നതതലയോഗം വിളിച്ചു. ഉഷ്ണ തരംഗ സാഹചര്യം വിലയിരുത്തുന്നതിനും ആവശ്യമായ നടപടികൾ സ്വീകരിക്കുന്നതിനുമാണ് യോഗം . നാളെ രാവിലെ 11 മണിക്കാണ് ഓൺലൈനായി യോഗം ചേരും. ബന്ധപ്പെട്ട മന്ത്രിമാരും ചീഫ് സെക്രട്ടറിയും ദുരന്തനിവാരണ അതോറിറ്റി ഉദ്യോഗസ്ഥർക്കും യോഗത്തിൽ പങ്കെടുക്കാൻ നിർദ്ദേശമുണ്ട്.
ചൂട് ക്രമാതീതമായി വർധിച്ചതിനുപിന്നാലെ സംസ്ഥാനത്ത് ഉഷ്ണ തരംഗത്തിന് സാധ്യതയുണ്ടെന്ന് സംസ്ഥാന ദുരന്ത നിവാരണ അതോറിറ്റി വ്യക്തമാക്കിയിരുന്നു. ചൂട് വർധിക്കുന്നതിനൊപ്പം അൾട്രാവയലറ്റ് വികിരണത്തോതും ആശങ്കാജനകമായി ഉയരുന്നുണ്ട്. ഇത് കാരണം വിവിധ ഏജൻസികൾ പൊതുജനങ്ങൾക്കായി സുരക്ഷ മുൻകരുതലുകൾ പുറപ്പെടുവിച്ചിട്ടുണ്ട്. പകൽ 11 മുതൽ 3 വരെയുള്ള സമയങ്ങളിൽ ശരീരത്തിൽ നേരിട്ട് വെയിൽ കൊള്ളുന്നത് ഒഴിവാക്കണമെന്നും പുറത്തിറങ്ങുമ്പോൾ കുട, തൊപ്പി, സൺഗ്ലാസ്, പാദരക്ഷകൾ എന്നിവ നിർബന്ധമായും ധരിക്കണമെന്നും നിർദേശത്തിൽ പറയുന്നു. ലോക്ഡൗണിനു സമാനമായ ജാഗ്രത സ്വീകരിക്കണമെന്നും നിർദേശമുണ്ട്.പലയിടങ്ങളിലും വേനൽ മഴ പെയ്യുന്നുണ്ടെങ്കിലും ചൂടിന് ശമനമുണ്ടാകുന്നില്ല.
