ന്യൂഡല്ഹി: വന്ദേ ഭാരത്, അമൃത് ഭാരത് ട്രെയിനുകള്ക്ക് ലഭിച്ച വന് സ്വീകാര്യതയ്ക്ക് പിന്നാലെ, രാജ്യത്തെ പ്രധാന നഗരങ്ങളെ ബന്ധിപ്പിക്കുന്ന ശതാബ്ദി, ജനശതാബ്ദി ട്രെയിനുകളുടെ മുഖച്ഛായ മാറ്റാന് ഇന്ത്യന് റെയില്വേ ഒരുങ്ങുന്നു. യാത്രാസൗകര്യങ്ങള് വര്ദ്ധിപ്പിക്കുന്നതിനൊപ്പം ട്രെയിനുകളുടെ ഉള്ഭാഗവും പുറംഭാഗവും ആധുനിക നിലവാരത്തിലേക്ക് ഉയര്ത്താനാണ് റെയില്വേ ബോര്ഡ് ലക്ഷ്യമിടുന്നത്. ട്രെയിനുകളുടെ ഗുണനിലവാരം വര്ദ്ധിപ്പിക്കുന്നതിനായി റെയില്വേ ബോര്ഡ് എല്ലാ സോണുകള്ക്കും കര്ശന നിര്ദ്ദേശം നല്കിയിട്ടുണ്ട്.
പ്രധാനമായും കോച്ചുകളുടെ ഫ്ലോറിംഗും പാനലുകളും പുതുക്കിപ്പണിയും. സീറ്റുകള്ക്ക് കൂടുതല് സുഖപ്രദമായ കവറുകള് നല്കുന്നതിനൊപ്പം ചാര്ജിംഗ് പോയിന്റുകളും സ്നാക്ക് ടേബിളുകളും അന്താരാഷ്ട്ര നിലവാരത്തിലേക്ക് മാറ്റും. യാത്രക്കാരുടെ പ്രധാന പരാതിയായ ശുചിമുറികളില് ആധുനിക ഫിറ്റിംഗുകളും മെച്ചപ്പെട്ട ഡ്രെയിനേജ് സംവിധാനവും ഉറപ്പാക്കും. കോച്ചുകളില് സിസിടിവി നിരീക്ഷണം കര്ശനമാക്കും. ഡിജിറ്റല് ഇന്ഫര്മേഷന് ഡിസ്പ്ലേ ബോര്ഡുകള് കൂടുതല് കാര്യക്ഷമമാക്കും.
ട്രെയിനുകള് ഓടുമ്പോഴുണ്ടാകുന്ന കുലുക്കം കുറച്ച് സുഗമമായ യാത്ര ഉറപ്പാക്കാന് സാങ്കേതിക പരിഷ്കാരങ്ങള് വരുത്തും. വ്യക്തമായ ഡെസ്റ്റിനേഷന് ബോര്ഡുകള് സ്ഥാപിക്കുന്നതിനൊപ്പം ട്രെയിനുകളുടെ പുറംഭാഗം കൂടുതല് ആകര്ഷകമായ നിറങ്ങളില് നവീകരിക്കും. രാജ്യത്ത് നിലവില് സര്വീസ് നടത്തുന്ന 25 ജോഡി ശതാബ്ദി ട്രെയിനുകളും ഇരുപതിലധികം ജനശതാബ്ദി എക്സ്പ്രസുകളുമാണ് ഈ വിപുലമായ നവീകരണ പദ്ധതിയുടെ ഭാഗമാകുന്നത്.
കോച്ചുകളിലെ പോരായ്മകള് കൃത്യമായി കണ്ടെത്താനും അവ സമയബന്ധിതമായി പരിഹരിക്കാനുമുള്ള വിശദമായ കര്മ്മപദ്ധതികള് തയ്യാറാക്കാന് എല്ലാ സോണുകളോടും റെയില്വേ ബോര്ഡ് ആവശ്യപ്പെട്ടിട്ടുണ്ട്. നിലവിലുള്ള ട്രെയിനുകളിലെ സേവന നിലവാരം വന്ദേ ഭാരതിന് തുല്യമായി ഉയര്ത്തുക എന്നതാണ് ഈ പദ്ധതിയിലൂടെ റെയില്വേ ലക്ഷ്യമിടുന്നത്.
