ഗാന്ധി നഗര്: ഗുജറാത്ത് തദ്ദേശ സ്വയംഭരണ തെരഞ്ഞെടുപ്പില് റെക്കോര്ഡ് വിജയവുമായി ഭാരതീയ ജനതാ പാര്ട്ടി. സംസ്ഥാനത്തെ 15 മുനിസിപ്പല് കോര്പ്പറേഷനുകളിലും എതിരാളികളെ നിഷ്പ്രഭമാക്കിയാണ് ബിജെപി അധികാരം പിടിച്ചെടുത്തത്. നിയമസഭാ തെരഞ്ഞെടുപ്പിന്റെ മുന്നോടിയായി നടന്ന ഈ വോട്ടെടുപ്പ് ഫലം ഭരണകക്ഷിക്ക് വലിയ ഊര്ജ്ജമാണ് നല്കുന്നത്. അഹമ്മദാബാദ്, സൂറത്ത്, വഡോദര, രാജ്കോട്ട് തുടങ്ങി എല്ലാ പ്രധാന നഗരങ്ങളിലും ബിജെപി വ്യക്തമായ ഭൂരിപക്ഷം നേടി. പുതുതായി രൂപീകരിച്ച നവസാരി, മോര്ബി, വാപി, പോര്ബന്തര് ഉള്പ്പെടെയുള്ള ഒമ്പത് മുനിസിപ്പല് കോര്പ്പറേഷനുകളിലും ബിജെപിക്കാണ് ജയം.
ജില്ലാ, താലൂക്ക് പഞ്ചായത്തുകളിലും മുനിസിപ്പാലിറ്റികളിലും ബിജെപി തങ്ങളുടെ കരുത്ത് തെളിയിച്ചു. താലൂക്ക് പഞ്ചായത്തുകളില് 1,165 സീറ്റുകളും, ജില്ലാ പഞ്ചായത്തുകളില് 251 സീറ്റുകളും, മുനിസിപ്പാലിറ്റികളില് 825 സീറ്റുകളും, മുനിസിപ്പല് കോര്പ്പറേഷനുകളില് 290 സീറ്റുകളും നേടി ബിജെപി എതിരാളികളേക്കാള് ബഹുദൂരം മുന്നിലെത്തി. സംസ്ഥാനത്തെ പ്രധാന പ്രതിപക്ഷമായ കോണ്ഗ്രസിന് എല്ലാ മേഖലകളിലും വന് തിരിച്ചടിയാണ് നേരിട്ടത്.
പല കോര്പ്പറേഷനുകളിലും ഒറ്റയക്കത്തിലേക്ക് ഒതുങ്ങിയ കോണ്ഗ്രസിന് ഗ്രാമീണ മേഖലകളിലും സ്വാധീനം നിലനിര്ത്താനായില്ല. ആം ആദ്മി പാര്ട്ടിയുടെ സാന്നിധ്യം ചിലയിടങ്ങളില് ശ്രദ്ധിക്കപ്പെട്ടെങ്കിലും ബിജെപിയുടെ മുന്നേറ്റത്തെ തടയാന് ആര്ക്കും സാധിച്ചില്ല. ഏപ്രില് 26-ന് നടന്ന വോട്ടെടുപ്പില് ജനങ്ങള് നല്കിയ ഈ വിധിയെ വികസന നയങ്ങള്ക്കുള്ള അംഗീകാരമായാണ് ബിജെപി നേതൃത്വം വിലയിരുത്തുന്നത്. നഗര മേഖലകള്ക്കൊപ്പം ഗ്രാമീണ മേഖലകളും ഭരണകക്ഷിക്കൊപ്പം ഉറച്ചുനിന്നതാണ് ഈ ചരിത്ര വിജയത്തിന് പിന്നിലെ പ്രധാന ഘടകം.
