ലേ: രണ്ട് ദിവസത്തെ ഔദ്യോഗിക സന്ദര്ശനത്തിനായി കേന്ദ്ര ആഭ്യന്തര മന്ത്രി അമിത് ഷാ ലഡാക്കിലെത്തി. ബുദ്ധപൂര്ണിമ ആഘോഷങ്ങളോടനുബന്ധിച്ച് ഗൗതമ ബുദ്ധന്റെ വിശുദ്ധ തിരുശേഷിപ്പുകളുടെ ആദ്യ അന്താരാഷ്ട്ര പ്രദര്ശനം ഉദ്ഘാടനം ചെയ്യാനാണ് അദ്ദേഹം എത്തിയത്. ലേ വിമാനത്താവളത്തില് ലഡാക്ക് ലഫ്റ്റനന്റ് ഗവര്ണര് വിനയ് കുമാര് സക്സേനയുടെ നേതൃത്വത്തില് അദ്ദേഹത്തിന് ഊഷ്മളമായ സ്വീകരണം നല്കി. ഉത്തര്പ്രദേശിലെ പിപ്രഹ്വയില് നിന്ന് കണ്ടെത്തിയ ബുദ്ധന്റെ പവിത്രമായ തിരുശേഷിപ്പുകളാണ് ലഡാക്കില് പൊതുജനങ്ങള്ക്ക് ദര്ശനത്തിനായി എത്തിച്ചിരിക്കുന്നത്.
തായ്ലന്ഡ്, വിയറ്റ്നാം തുടങ്ങിയ വിദേശ രാജ്യങ്ങളില് പ്രദര്ശിപ്പിച്ചിട്ടുണ്ടെങ്കിലും, ഇന്ത്യയ്ക്കകത്ത് ഇവ മറ്റൊരു സ്ഥലത്തേക്ക് ദര്ശനത്തിനായി കൊണ്ടുപോകുന്നത് ഇതാദ്യമായാണ്. മെയ് 2 മുതല് 10 വരെ ലേയിലെ ജിവെത്സലില് പൊതുദര്ശനം ഉണ്ടാക്കുക. പിന്നീട് മെയ് 11, 12 എന്നീ തീയതികളില് സാന്സ്കറിലും, മെയ് 13, 14 തീയതികളില് ലേയിലെ ധര്മ്മ സെന്ററിലും പ്രദര്ശനം ഉണ്ടായിരിക്കും. ആത്മീയ ചടങ്ങുകള്ക്ക് പുറമെ ലഡാക്കിന്റെ വികസനവും സുരക്ഷയും സംബന്ധിച്ച ചര്ച്ചകളും ആഭ്യന്തര മന്ത്രിയുടെ സന്ദര്ശനത്തിന്റെ ഭാഗമാണ്.
കാര്ഗിലില് പ്രതിദിനം 10,000 ലിറ്റര് ശേഷിയുള്ള ഡയറി പ്ലാന്റിന്റെ ശിലാസ്ഥാപനം അദ്ദേഹം ഓണ്ലൈനായി നിര്വഹിക്കും. കൂടാതെ, പ്രാദേശിക പ്രതിനിധികളുമായും ഉദ്യോഗസ്ഥരുമായും അദ്ദേഹം കൂടിക്കാഴ്ച നടത്തും. അമിത് ഷായുടെ സന്ദര്ശനവേളയില് നിര്ണ്ണായകമായ ചര്ച്ചകള് നടത്തണമെന്ന് ലേ അപെക്സ് ബോഡി ആവശ്യപ്പെട്ടിട്ടുണ്ട്. ലഡാക്കിന് സംസ്ഥാന പദവി നല്കുക, ഭരണഘടനയുടെ ആറാം ഷെഡ്യൂളില് ഉള്പ്പെടുത്തുക, പ്രത്യേക പബ്ലിക് സര്വീസ് കമ്മീഷന് രൂപീകരിക്കുക തുടങ്ങിയ ആവശ്യങ്ങള് ഇവര് ഉന്നയിക്കുന്നുണ്ട്.
കാലാവസ്ഥാ പ്രവര്ത്തകന് സോനം വാങ്ചുക്കും ഈ ആവശ്യങ്ങളില് അടിയന്തര തീരുമാനമുണ്ടാകണമെന്ന് കേന്ദ്രത്തോട് അഭ്യര്ത്ഥിച്ചു. ലഡാക്കിന്റെ സാംസ്കാരികവും തന്ത്രപ്രധാനവുമായ പ്രാധാന്യം വിളിച്ചോതുന്നതാണ് ആഭ്യന്തര മന്ത്രിയുടെ ഈ സന്ദര്ശനം. ഭരണപരമായ അവലോകനത്തിനൊപ്പം ആത്മീയമായ ഔന്നത്യവും ഈ സന്ദര്ശനത്തിന് മാറ്റു കൂട്ടുന്നു.
