കൊല്ക്കത്ത: പശ്ചിമ ബംഗാള് നിയമസഭാ തിരഞ്ഞെടുപ്പിന്റെ രണ്ടാം ഘട്ടത്തില് വ്യാപക ക്രമക്കേടുകള് റിപ്പോര്ട്ട് ചെയ്തതിനെത്തുടര്ന്ന് സൗത്ത് 24 പര്ഗാനാസ് ജില്ലയിലെ 15 ബൂത്തുകളില് ഇന്ന് പുനര്വോട്ടെടുപ്പ് നടക്കുന്നു. ഇന്ന് രാവിലെ 7 മണിക്ക് ആരംഭിച്ച വോട്ടെടുപ്പ് വൈകുന്നേരം 6 മണി വരെ തുടരും. തിരഞ്ഞെടുപ്പ് കമ്മീഷന്റെ ഉത്തരവ് പ്രകാരം താഴെ പറയുന്ന ബൂത്തുകളിലാണ് റീപോളിംഗ് നടക്കുന്നത്.
ഒന്പത് മണി വരെയുള്ള പോളിങ് കണക്ക് എടുക്കുമ്പോള് മഗ്രാഹത്ത് പശ്ചിമ്മില് 16.68% രേഖപ്പെടുത്തിയിരിക്കുന്നത്. ഡയമണ്ട് ഹാര്ബറില് 15.83% പോളിംങ്ങാണ് രേഖപ്പെടുത്തിയിരിക്കുന്നത്. പുനര്വോട്ടെടുപ്പ് പുരോഗമിക്കവെ ഡയമണ്ട് ഹാര്ബറിലെ റോയ്നഗര് പ്രൈമറി സ്കൂളിലെ (ബൂത്ത് നമ്പര് 243) വോട്ടിംഗ് മെഷീന് തകരാറിലായത് വോട്ടര്മാരെ വലച്ചു. ഇതേത്തുടര്ന്ന് വോട്ടെടുപ്പ് ദീര്ഘനേരം തടസ്സപ്പെട്ടു.
ഏപ്രില് 29-ന് നടന്ന വോട്ടെടുപ്പില് ഇവിഎം മെഷീനുകളില് കൃത്രിമം കാണിച്ചതായും ബിജെപി അനുകൂല ബട്ടണുകള് ടേപ്പ് ഒട്ടിച്ച് മറച്ചതായും പരാതി ഉയര്ന്നിരുന്നു. ഇതിന്റെ അടിസ്ഥാനത്തിലാണ് കമ്മീഷന്റെ നടപടി. തിരഞ്ഞെടുപ്പ് കമ്മീഷന്റെ തീരുമാനത്തെ ബിജെപി നേതാക്കളായ സുവേന്ദു അധികാരിയും അമിത് മാളവ്യയും സ്വാഗതം ചെയ്തു. എന്നാല് കൂടുതല് ബൂത്തുകളില് പുനര്വോട്ടെടുപ്പ് വേണമെന്നാണ് ഇവരുടെ ആവശ്യം.
ഡയമണ്ട് ഹാര്ബറിലെ ഫാള്ട്ട ഉള്പ്പെടെയുള്ള ഇടങ്ങളില് വോട്ടര്മാരെ തൃണമൂല് ഗുണ്ടകള് തടഞ്ഞതായി അമിത് മാളവ്യ ആരോപിച്ചു. ശക്തമായ സുരക്ഷാ സജ്ജീകരണങ്ങളാണ് പുനര്വോട്ടെടുപ്പ് നടക്കുന്ന ബൂത്തുകളില് ഏര്പ്പെടുത്തിയിരിക്കുന്നത്. ബാഗ്ദ ജൂനിയര് ഹൈസ്കൂള് ഉള്പ്പെടെയുള്ള പോളിംഗ് കേന്ദ്രങ്ങളില് രാവിലെ മുതല് വോട്ടര്മാരുടെ നീണ്ട ക്യൂ ദൃശ്യമാണ്. ഏപ്രില് 23, 29 തീയതികളില് നടന്ന തിരഞ്ഞെടുപ്പിന്റെ അന്തിമഫലം മെയ് 4 ചൊവ്വാഴ്ച പുറത്തുവരും.
