ശ്രീനഗര്: ജമ്മു കാശ്മീരിലെ പുല്വാമയില് സൈന്യവും പോലീസും സംയുക്തമായി നടത്തിയ തിരച്ചിലില് ലഷ്കര് ബന്ധമുള്ള ഭീകരന് പിടിയിലായി. രാജ്പോറയിലെ കാസ്ബയര് മേഖലയില് ഒളിച്ചുതാമസിക്കുകയായിരുന്ന കാച്ചിപോറ സ്വദേശി മുഹമ്മദ് ഉമര് മാലിക്കിനെയാണ് അതിസാഹസികമായി സുരക്ഷാസേന പിടികൂടിയത്. മേഖലയില് ഭീകരര് തമ്പടിച്ചിട്ടുണ്ടെന്ന കൃത്യമായ രഹസ്യവിവരത്തിന്റെ അടിസ്ഥാനത്തിലായിരുന്നു നീക്കം.
രാഷ്ട്രീയ റൈഫിള്സ്, പുല്വാമ പോലീസ്, സി.ആര്.പി.എഫ് 183-ാം ബറ്റാലിയന് എന്നീ സേനകളാണ് ഓപ്പറേഷനില് പങ്കെടുത്തത്. ഞായറാഴ്ച പുലര്ച്ചെ കാസ്ബയര് പ്രദേശം സൈന്യം പൂര്ണ്ണമായും വളയുകയായിരുന്നു. ഒരു പിസ്റ്റള്, തിരകള്, രണ്ട് ഗ്രനേഡുകള് എന്നിവ ഇയാളില് നിന്ന് പിടിച്ചെടുത്തു. പ്രദേശത്ത് വലിയ രീതിയിലുള്ള അട്ടിമറി പ്രവര്ത്തനങ്ങള് ലക്ഷ്യമിട്ടാണ് ഇയാള് ആയുധങ്ങളുമായി എത്തിയതെന്ന് സുരക്ഷാ വൃത്തങ്ങള് അറിയിച്ചു.
അതിര്ത്തിക്കപ്പുറത്തെ ഭീകരസംഘടനകളുടെ നിര്ദ്ദേശപ്രകാരമാണ് ഇയാള് പ്രവര്ത്തിച്ചിരുന്നത്. പിടിയിലായ ഉമര് മാലിക്കിനെ ചോദ്യം ചെയ്യുന്നതിലൂടെ താഴ്വരയിലെ മറ്റ് ഭീകരശൃംഖലകളെക്കുറിച്ചും സ്ഫോടകവസ്തുക്കള് എത്തിക്കുന്ന വഴികളെക്കുറിച്ചും നിര്ണ്ണായക വിവരങ്ങള് ലഭിക്കുമെന്നാണ് കരുതുന്നത്. ‘ഭീകരവാദത്തിനെതിരെയുള്ള കര്ശന നിലപാടിന്റെ ഭാഗമായി മേഖലയില് തിരച്ചില് ശക്തമാക്കിയിട്ടുണ്ട്. സുരക്ഷാ ഭീഷണികളെ മുളയിലേ നുള്ളാന് സേന സജ്ജമാണ്.’
രാജ്പോറ പോലീസ് സ്റ്റേഷനില് ഇയാള്ക്കെതിരെ യു.എ.പി.എ അടക്കമുള്ള വകുപ്പുകള് പ്രകാരം കേസെടുത്തു. കൂടുതല് വിവരങ്ങള് ശേഖരിക്കുന്നതിനായി പ്രതിയെ രഹസ്യ കേന്ദ്രത്തിലേക്ക് മാറ്റി. മേഖലയില് ഇയാളെ സഹായിച്ച മറ്റാരെങ്കിലും ഉണ്ടോ എന്നറിയാന് സൈന്യം വീടുകള് കേന്ദ്രീകരിച്ചുള്ള പരിശോധന തുടരുകയാണ്. സേനയുടെ സമയബന്ധിതമായ ഇടപെടലിലൂടെ വന് ദുരന്തമാണ് ഒഴിവായതെന്ന് പ്രതിരോധ വക്താവ് വ്യക്തമാക്കി.
