കൊല്ലം: ചാത്തന്നൂരിലെ ജനങ്ങള്‍ നല്‍കിയ അവസരവും പിന്തുണയുമാണ് തന്റെ വിജയത്തിന് പിന്നിലെന്ന് നിയുക്ത എംഎല്‍എ ബി.ബി. ഗോപകുമാര്‍. കമ്യൂണിസ്റ്റ് കോട്ടയില്‍ ഒരു വലിയ മാറ്റത്തിന് തുടക്കം കുറിക്കാന്‍ കഴിഞ്ഞുവെന്നും ഈ മാറ്റം കൊല്ലം ജില്ലയിലെ മറ്റ് മണ്ഡലങ്ങളിലേക്കും വ്യാപിക്കുമെന്നും അദ്ദേഹം പറഞ്ഞു. 4012 വോട്ടുകളുടെ ഭൂരിപക്ഷത്തിനാണ് ബി.ബി. ഗോപകുമാര്‍ ചാത്തന്നൂരില്‍ എന്‍ഡിഎയ്‌ക്ക് വേണ്ടി അട്ടിമറി വിജയം നേടിയത്.
മോദി സര്‍ക്കാരിന്റെ വികസന പ്രവര്‍ത്തനങ്ങള്‍ ചാത്തന്നൂരിലെത്തണമെന്ന് ജനങ്ങള്‍ ആഗ്രഹിച്ചതായും, കഴിഞ്ഞ രണ്ട് തവണ രണ്ടാം സ്ഥാനത്തെത്തിയ തനിക്ക് ഇത്തവണ ഒരു അവസരം നല്‍കാന്‍ വോട്ടര്‍മാര്‍ തീരുമാനിച്ചതായും അദ്ദേഹം കൂട്ടിച്ചേര്‍ത്തു. എല്‍ഡിഎഫ്-യുഡിഎഫ് അടിയൊഴുക്കുകളെ മറികടന്നാണ് ജനങ്ങള്‍ ഈ വിജയം സമ്മാനിച്ചതെന്നും ഗോപകുമാര്‍ വ്യക്തമാക്കി.
വോട്ടെണ്ണലിനിടെ ഭൂരിപക്ഷ കണക്കുകള്‍ മാറിമറിഞ്ഞെങ്കിലും ഒടുവില്‍ ഗോപകുമാര്‍ വിജയം ഉറപ്പിക്കുകയായിരുന്നു. 2016-ലും 2021-ലും രണ്ടാം സ്ഥാനത്തെത്തിയ അദ്ദേഹം ഇക്കുറി കരുത്തനായ എതിരാളി എല്‍ഡിഎഫിന്റെ ആര്‍. രാജേന്ദ്രനെ പരാജയപ്പെടുത്തിയാണ് നിയമസഭയിലേക്ക് എത്തുന്നത്. കോണ്‍ഗ്രസ് സ്ഥാനാര്‍ത്ഥി സൂരജ് രവി മൂന്നാം സ്ഥാനത്തേക്ക് തള്ളപ്പെട്ടു.
ചാത്തന്നൂര്‍ മീനാട് സ്വദേശിയായ ഗോപകുമാര്‍ ബിജെപിയുടെ മുതിര്‍ന്ന നേതാക്കളിലൊരാളാണ്. നിലവില്‍ ബിജെപിയുടെ തിരുവനന്തപുരം മേഖലാ പ്രസിഡന്റാണ്. മുന്‍പ് കൊല്ലം ജില്ലാ പ്രസിഡന്റായും പ്രവര്‍ത്തിച്ചിട്ടുണ്ട്. ചാത്തന്നൂര്‍ എസ്.എന്‍. ട്രസ്റ്റ് എച്ച്.എസ്.എസില്‍ പ്രഥമാധ്യാപകനായി സേവനമനുഷ്ഠിച്ചിരുന്ന അദ്ദേഹം ബിരുദാനന്തര ബിരുദധാരിയാണ്. രാഷ്‌ട്രീയത്തിനപ്പുറം നാട്ടുകാര്‍ക്കിടയിലുള്ള വ്യക്തിബന്ധവും സ്വീകാര്യതയുമാണ് ഇത്തവണ ബിജെപിയെ വിജയത്തിലെത്തിച്ചത്.
പൂയപ്പള്ളി, ആഴ്ചല്ലൂര്‍ തുടങ്ങിയ ഇടതു-വലതു കേന്ദ്രങ്ങളില്‍ പോലും വന്‍ മുന്നേറ്റം നടത്താന്‍ എന്‍ഡിഎയ്‌ക്ക് സാധിച്ചു എന്നത് ഈ വിജയത്തിന്റെ തിളക്കം വര്‍ദ്ധിപ്പിക്കുന്നു. കൊല്ലം ജില്ലയില്‍ നിന്നുള്ള ആദ്യ ബിജെപി എംഎല്‍എ എന്ന ചരിത്രനേട്ടം കൂടിയാണ് ഇതോടെ ബി.ബി. ഗോപകുമാര്‍ സ്വന്തമാക്കിയത്.
