പത്തനംതിട്ട: മലയാള സിനിമയിലെ പരിചിത മുഖമായ നടന് സന്തോഷ് കെ നായര് (65) അന്തരിച്ചു. പത്തനംതിട്ട ഏനാത്തുണ്ടായ വാഹനാപകടത്തില് പരിക്കേറ്റ് ചികിത്സയിലായിരിക്കെയാണ് അന്ത്യം. സന്തോഷ് സഞ്ചരിച്ചിരുന്ന കാര് ലോറിയുമായി കൂട്ടിയിടിച്ചായിരുന്നു അപകടം. ചികിത്സാ ഘട്ടത്തില് സംഭവിച്ച ഹൃദയാഘാതമാണ് മരണകാരണം. ഏനാത്ത് വെച്ച് താരം സഞ്ചരിച്ചിരുന്ന വാഹനവും ലോറിയും തമ്മില് ഇടിക്കുകയായിരുന്നു. അപകടസമയത്ത് കൂടെയുണ്ടായിരുന്ന ഭാര്യ ശുഭശ്രീക്കും ലോറി ഡ്രൈവര്ക്കും പരിക്കേറ്റിട്ടുണ്ട്. ഇവര് ആശുപത്രിയില് നിരീക്ഷണത്തിലാണ്.
1982-ല് ‘ഇതു ഞങ്ങളുടെ കഥ’ എന്ന ചിത്രത്തിലൂടെയാണ് വെള്ളിത്തിരയില് അരങ്ങേറ്റം കുറിച്ചത്. നായകന്, വില്ലന്, സ്വഭാവനടന്, കോമഡി വേഷങ്ങള് എന്നിങ്ങനെ നൂറിലധികം സിനിമകളില് അദ്ദേഹം തന്റെ സാന്നിധ്യം അറിയിച്ചു. നിലവില് തിയേറ്ററുകളില് പ്രദര്ശിപ്പിച്ചു വരുന്ന ‘മോഹിനിയാട്ടം’ ആണ് അദ്ദേഹം അഭിനയിച്ച അവസാന ചിത്രം. 1960 നവംബര് 12-ന് തിരുവനന്തപുരത്ത് സി.എന്. കേശവന് നായരുടെയും പി. രാജലക്ഷ്മി അമ്മയുടെയും മകനായാണ് അദ്ദേഹം ജനിച്ചത്. തലസ്ഥാനത്തെ എം.ജി. കോളേജിലായിരുന്നു വിദ്യാഭ്യാസം. സൂപ്പര് താരം മോഹന്ലാലിന്റെ ജൂനിയറായി ഇതേ കോളേജില് അദ്ദേഹം പഠിച്ചിരുന്നു.
വൈവിധ്യമാര്ന്ന കഥാപാത്രങ്ങളിലൂടെ മലയാളികളുടെ മനസ്സില് ഇടംപിടിച്ച കലാകാരന്റെ അപ്രതീക്ഷിത വിയോഗത്തില് സിനിമാ സാംസ്കാരിക ലോകം അനുശോചനം രേഖപ്പെടുത്തി.
