തിരുവനന്തപുരം: നിയമസഭാ തിരഞ്ഞെടുപ്പില് നേരിട്ട കനത്ത തിരിച്ചടിക്ക് പിന്നാലെ, ഒട്ടും ആഘോഷങ്ങളില്ലാതെ മുന് മുഖ്യമന്ത്രി പിണറായി വിജയന് തലസ്ഥാനത്ത് തിരിച്ചെത്തി. വോട്ടെണ്ണല് ദിനത്തില് കണ്ണൂരിലായിരുന്ന അദ്ദേഹം ഇന്ന് രാവിലെയാണ് തിരുവനന്തപുരം വിമാനത്താവളത്തില് ഇറങ്ങിയത്. പത്ത് വര്ഷം കേരളത്തിന്റെ അമരത്തിരുന്ന ശേഷം പടിയിറങ്ങുന്ന പിണറായി വിജയനെ സ്വീകരിക്കാന് ഇത്തവണ പതിവ് ജനക്കൂട്ടമോ പാര്ട്ടി പ്രവര്ത്തകരോ ഉണ്ടായിരുന്നില്ല.
വിമാനത്താവളത്തില് നിന്ന് എകെജി സെന്ററില് നിന്നുള്ള വാഹനത്തിലാണ് അദ്ദേഹം ഔദ്യോഗിക വസതിയായ ക്ലിഫ് ഹൗസിലേക്ക് പോയത്. ഭാര്യയും മകളും പേരക്കുട്ടിയും അദ്ദേഹത്തിനൊപ്പമുണ്ടായിരുന്നു. മുഖ്യമന്ത്രി സ്ഥാനം രാജിവെച്ച സാഹചര്യത്തില് വരും ദിവസങ്ങളില് തന്നെ അദ്ദേഹം ഔദ്യോഗിക വസതി ഒഴിഞ്ഞു കൊടുക്കുമെന്നാണ് സൂചന.
വിമാനത്താവളത്തില് വച്ച് മാധ്യമപ്രവര്ത്തകര് പ്രതികരണം തേടിയെങ്കിലും തിരഞ്ഞെടുപ്പ് ഫലത്തെക്കുറിച്ച് ഒന്നും സംസാരിക്കാന് അദ്ദേഹം തയ്യാറായില്ല. ചുറ്റും കൂടിയവര്ക്ക് നേരെ കൈവീശി കാണിച്ച് അദ്ദേഹം കാറില് കയറി മടങ്ങുകയായിരുന്നു. തോല്വിയുടെ ആഘാതത്തില് പാര്ട്ടി നേതൃത്വം പ്രതിരോധത്തിലായിരിക്കുന്ന സാഹചര്യത്തിലാണ് ഈ മൗനം.
2016 മുതല് നീണ്ട പത്ത് വര്ഷം കേരളത്തിന്റെ ഭരണചക്രം തിരിച്ച പിണറായി വിജയന് പാര്ട്ടിക്കേറ്റ തിരിച്ചടി വലിയ വെല്ലുവിളിയാണ് ഉയര്ത്തുന്നത്. കഴിഞ്ഞ സഭയില് 67 സീറ്റുകളുണ്ടായിരുന്ന സി.പി.എമ്മിന് ഇത്തവണ കേവലം 26 സീറ്റുകള് മാത്രമാണ് നേടാനായത്. പാര്ട്ടിയുടെയും ഭരണത്തിന്റെയും വീഴ്ചകളാണ് ഈ തകര്ച്ചയ്ക്ക് കാരണമെന്ന തരത്തില് സാമൂഹിക മാധ്യമങ്ങളിലും അണികള്ക്കിടയിലും കടുത്ത പ്രതിഷേധം ഉയരുന്നുണ്ട്.
കേരളത്തിന്റെ ചരിത്രത്തില് ദീര്ഘകാലം മുഖ്യമന്ത്രിയായിരുന്നവരില് ഒരാള് എന്ന ഖ്യാതിയോടെയാണ് അദ്ദേഹം 2026 മേയില് അധികാരമൊഴിയുന്നത്. എന്നാല് അപ്രതീക്ഷിതമായ ഈ തിരഞ്ഞെടുപ്പ് പരാജയം പിണറായി വിജയന്റെയും പാര്ട്ടിയുടെയും ഭാവി നീക്കങ്ങളില് വലിയ ചര്ച്ചകള്ക്ക് വഴിതുറക്കും.
