കണ്ണൂർ: നിയുക്ത കോൺഗ്രസ് എം എൽ എ മാത്യു കുഴൽനാടനെ അധിക്ഷേപിച്ച് മുസ്‌ലിം യൂത്ത് ലീഗിന്റെ ഫ്ലെക്സ്. കണ്ണൂർ ഇരിക്കൂറിൽ സ്ഥാപിച്ച ബോർഡിലാണ് മാത്യു കുഴൽനാടൻ കുഴലൂത്തുകാരനെന്നധിക്ഷേപിക്കുന്നത്.
“കുഴൽനാടാ, നിന്റെ കുഴലൂത്ത് ലീഗിനെതിരെ വേണ്ട” എന്ന വാചകങ്ങളോടെയാണ് ബോർഡ്. മുഖ്യമന്ത്രിയായി വി ഡി സതീശനെ പിന്തുണച്ചുകൊണ്ട് “പട നയിച്ചവൻ നയിക്കട്ടെ” എന്നും ബോർഡിലുണ്ട്. യൂത്ത് ലീഗ് ഇരിക്കൂർ പഞ്ചായത്ത് കമ്മിറ്റിയാണ് ബോർഡ് സ്ഥാപിച്ചത്.
മുഖ്യമന്ത്രി സ്ഥാനം ലക്ഷ്യമാക്കി കോൺഗ്രസിൽ നടക്കുന്ന ഗ്രൂപ്പ് കളിക്കിടെ വി ഡി സതീശനുവേണ്ടി സമ്മർദം ചൊലുത്തിയ മുസ്ലിംലീഗിനെതിരെ വിമർശനവുമായി മാത്യു കുഴൽനാടൻ രംഗത്തെത്തിയിരുന്നു. ലീഗിന്റെ ആഭ്യന്തര കാര്യങ്ങളിൽ കോൺഗ്രസ് ഇടപെടാറില്ലെന്നും, ലീഗിന്റെ നിയമസഭാകക്ഷി നേതാവ് ആരാകണമെന്ന് കോൺഗ്രസ് പറയുമോ എന്നും കുൽനാടൻ മാധ്യമങ്ങളോട് പ്രതികരിക്കുകയായിരുന്നു. സതീശനെ പുകഴ്‌ത്തി ലീഗ് സംസ്ഥാന പ്രസിഡന്റ്‌ സാദിഖലി തങ്ങൾ പലതവണ രംഗത്തെത്തിയതാണ് കുഴൽനാടന്റെ പ്രതികരണത്തിന് കാരണമായതെന്ന് പറയപ്പെടുന്നു.
