ന്യൂഡല്ഹി: ഇന്ത്യന് റെയില്വേയുടെ മുഖച്ഛായ മാറ്റുന്ന വന് സാങ്കേതിക വിപ്ലവത്തിന് ഓഗസ്റ്റ് മുതല് തുടക്കമാകുന്നു. 1986 മുതല് നിലവിലുള്ള പഴയ റിസര്വേഷന് സംവിധാനത്തിന് വിട നല്കി, അത്യാധുനിക സാങ്കേതികവിദ്യയില് അധിഷ്ഠിതമായ പുതിയ സംവിധാനം നടപ്പിലാക്കാന് റെയില്വേ മന്ത്രാലയം തീരുമാനിച്ചു. റെയില്വേ മന്ത്രി അശ്വിനി വൈഷ്ണവിന്റെ നേതൃത്വത്തില് നടന്ന അവലോകന യോഗത്തിലാണ് യാത്രക്കാര്ക്ക് ഏറെ ആശ്വാസം നല്കുന്ന ഈ പ്രഖ്യാപനമുണ്ടായത്.
2025-ല് റെയില്വേ പുറത്തിറക്കിയ ‘റെയില് വണ്’ സൂപ്പര് ആപ്പിലൂടെയാണ് പുതിയ മാറ്റങ്ങള് യാത്രക്കാരിലേക്ക് എത്തുന്നത്. ടിക്കറ്റ് ബുക്കിംഗ് സൈറ്റുകളിലെ സാങ്കേതിക തകരാറുകളും ഹാങ്ങിംഗും പരിഹരിക്കാന് ഈ പുതിയ സംവിധാനത്തിലൂടെ സാധിക്കും. ആര്ട്ടിഫിഷ്യല് ഇന്റലിജന്സ് ഉപയോഗിച്ച് പ്രവര്ത്തിക്കുന്ന പുതിയ സിസ്റ്റം, വെയ്റ്റ്ലിസ്റ്റ് ടിക്കറ്റുകള് കണ്ഫേം ആകാനുള്ള സാധ്യത 94 ശതമാനം കൃത്യതയോടെ മുന്കൂട്ടി പ്രവചിക്കും. നേരത്തെ ഇത് 53 ശതമാനം മാത്രമായിരുന്നു.
ട്രെയിന് ടിക്കറ്റ് ബുക്കിംഗ്, ക്യാന്സലേഷന്, പ്ലാറ്റ്ഫോം ടിക്കറ്റുകള്, അണ്റിസര്വ്ഡ് ടിക്കറ്റുകള് എന്നിവയെല്ലാം ഇനി റെയില് വണ് ആപ്പിലൂടെ ലഭിക്കും. ട്രെയിനിന്റെ ലൈവ് സ്റ്റാറ്റസ്, കോച്ചുകളുടെ സ്ഥാനം, പ്ലാറ്റ്ഫോം നമ്പര് എന്നിവയും പരാതികള് നല്കാനുള്ള ‘റെയില് മദദ്’ സംവിധാനവും ഇതില് സംയോജിപ്പിച്ചിട്ടുണ്ട്. പുതിയ സിസ്റ്റം നിലവില് വരുന്നതോടെ ഓണ്ലൈന് ബുക്കിംഗിലെ പരാജയങ്ങള് ഒഴിവാകുകയും റീഫണ്ട് നടപടികള് വേഗത്തിലാവുകയും ചെയ്യും.
നിലവില് രാജ്യത്തെ ടിക്കറ്റ് ബുക്കിംഗിന്റെ 88 ശതമാനവും ഓണ്ലൈന് വഴിയാണ് നടക്കുന്നത്. പ്രതിദിനം 9.29 ലക്ഷം ടിക്കറ്റുകളാണ് നിലവില് ആപ്പ് വഴി ബുക്ക് ചെയ്യപ്പെടുന്നത്. ഇതിനോടകം മൂന്ന് കോടിയിലധികം ആളുകള് ഈ ആപ്പ് ഡൗണ്ലോഡ് ചെയ്തുകഴിഞ്ഞു. പഴയ സംവിധാനത്തില് നിന്ന് പുതിയതിലേക്ക് മാറുമ്പോള് യാത്രക്കാര്ക്ക് യാതൊരുവിധ ബുദ്ധിമുട്ടും ഉണ്ടാകില്ലെന്ന് ഉറപ്പുവരുത്താന് ഉദ്യോഗസ്ഥര്ക്ക് മന്ത്രി അശ്വിനി വൈഷ്ണവ് കര്ശന നിര്ദ്ദേശം നല്കി. സഹമന്ത്രിമാരായ വി. സോമണ്ണ, രവ്നീത് സിംഗ് ബിട്ടു എന്നിവരും യോഗത്തില് പങ്കെടുത്തു.
ഓഗസ്റ്റ് മാസത്തോടെ പുതിയ സിസ്റ്റം പൂര്ണ്ണതോതില് പ്രവര്ത്തനസജ്ജമാകുന്നതോടെ ഇന്ത്യന് റെയില്വേ ലോകനിലവാരത്തിലുള്ള ഡിജിറ്റല് സേവനത്തിലേക്ക് ചുവടുവെക്കും.
