പുതുച്ചേരി: കേന്ദ്രഭരണ പ്രദേശമായ പുതുച്ചേരിയില് ഭരണം നിലനിര്ത്തി എന്ഡിഎ സഖ്യം. എന്. രംഗസ്വാമി തുടര്ച്ചയായ രണ്ടാം തവണയും മുഖ്യമന്ത്രിയായി മെയ് 13-ന് അധികാരമേല്ക്കും. സര്ക്കാര് രൂപീകരണത്തിന് അവകാശവാദം ഉന്നയിച്ചുകൊണ്ടുള്ള കത്ത് സഖ്യനേതാക്കള് ലെഫ്റ്റനന്റ് ഗവര്ണര് കെ. കൈലാഷ്നാഥന് കൈമാറി. പുതിയ സര്ക്കാരില് ബിജെപിക്ക് നിര്ണ്ണായക സ്വാധീനമുണ്ടാകും. സ്പീക്കര് പദവിക്ക് പുറമെ രണ്ട് മന്ത്രിസ്ഥാനങ്ങളും ബിജെപിക്ക് ലഭിക്കുമെന്നാണ് സൂചനകള്.
എ. നമശ്ശിവായത്തെ ബിജെപി നിയമസഭാ കക്ഷി നേതാവായി നേരത്തെ തന്നെ തിരഞ്ഞെടുത്തിരുന്നു. ‘വികസിത് പുതുച്ചേരി’ എന്ന ലക്ഷ്യത്തോടെ വികസന പ്രവര്ത്തനങ്ങള് ദ്രുതഗതിയിലാക്കുമെന്ന് അവകാശവാദം ഉന്നയിച്ച ശേഷം രംഗസ്വാമി മാധ്യമങ്ങളോട് പറഞ്ഞു. 30 അംഗ നിയമസഭയില് 18 സീറ്റുകള് നേടിയാണ് എന്ഡിഎ ഭരണം ഉറപ്പിച്ചത്. എഐഎന്ആര്സി 12 സീറ്റുകള് നേടി ഏറ്റവും വലിയ ഒറ്റകക്ഷിയായി.
ബിജെപി 4 സീറ്റുകളും എഐഎഡിഎംകെ, എല്ജെകെ ഓരോ സീറ്റുകള് വീതവും നേടി. പരമ്പരാഗത ശക്തികളായ ഡിഎംകെ 5 സീറ്റിലും കോണ്ഗ്രസ് വെറും ഒരു സീറ്റിലും ഒതുങ്ങി എന്നതാണ് ഈ തിരഞ്ഞെടുപ്പിലെ ശ്രദ്ധേയമായ കാര്യം. അതേസമയം, തമിഴ് നടന് വിജയ്യുടെ തമിഴക വെട്രി കഴകം (ടിവികെ) രണ്ട് സീറ്റുകള് നേടി പുതുച്ചേരി നിയമസഭയില് അക്കൗണ്ട് തുറന്നത് വലിയ രാഷ്ട്രീയ ചര്ച്ചകള്ക്ക് വഴിവെച്ചിട്ടുണ്ട്. മെയ് 13 വൈകുന്നേരം നടക്കുന്ന ചടങ്ങോടെ പുതിയ ഭരണകൂടം ഔദ്യോഗികമായി ചുമതലയേല്ക്കും.
