ശാസ്താംകോട്ട: കേരളത്തിലേക്ക് വന്തോതില് മാരക ലഹരിമരുന്നായ എംഡിഎംഎ കടത്തുന്ന സംഘത്തിലെ പ്രധാനികളെ ശാസ്താംകോട്ട പോലീസ് ബംഗളൂരുവില് നിന്ന് പിടികൂടി. കൊല്ലം മുണ്ടയ്ക്കല് സ്വദേശി അദ്വൈത, കണ്ണൂര് പറശ്ശിനിക്കടവ് സ്വദേശി മുഹമ്മദ് സിജാഹ് എന്നിവരാണ് അറസ്റ്റിലായത്. ബംഗളൂരുവില് വ്യാജപേരുകളില് ഫ്ലാറ്റ് വാടകയ്ക്കെടുത്ത് ഒളിവില് താമസിച്ച് ലഹരിവ്യാപാരം നടത്തിവരികയായിരുന്നു ഇരുവരും.
ബംഗളൂരുവില് റേഡിയോളജി പഠനത്തിനായി എത്തിയ അദ്വൈത അവിടെ വെച്ചാണ് ലഹരി മാഫിയയുമായി ബന്ധപ്പെടുന്നത്. അറസ്റ്റിലായ മുഹമ്മദ് സിജാഹ് നേരത്തെ തന്നെ കുപ്രസിദ്ധ ലഹരി ഇടപാടുകാരനാണ്. തിരുവനന്തപുരം അമരവിളയില് 75 ഗ്രാം എംഡിഎംഎ പിടികൂടിയ കേസ് ഉള്പ്പെടെ, കണ്ണൂര്, ഇരിട്ടി എന്നിവിടങ്ങളില് എക്സൈസ് രജിസ്റ്റര് ചെയ്ത മൂന്നിലധികം മയക്കുമരുന്ന് കേസുകളില് ഇയാള് പ്രതിയാണ്.
കഴിഞ്ഞ ഫെബ്രുവരിയില് ശാസ്താംകോട്ട ഐസിഎസ് ജംഗ്ഷനില് നിന്ന് എംഡിഎംഎയുമായി ഒരു യുവതി പിടിയിലായിരുന്നു. ഈ കേസിലെ രണ്ടാം പ്രതിയായ ഷംനാദിനെ ബംഗളൂരുവില് തെളിവെടുപ്പിന് എത്തിച്ചപ്പോഴാണ് ലഹരിമരുന്ന് കൈമാറുന്ന സംഘത്തിന്റെ വേരുകള് പോലീസിന് ലഭിച്ചത്. തുടര്ന്ന് കരുനാഗപ്പള്ളി സ്വദേശികളായ രണ്ടുപേരെയും ഒരു കര്ണാടക സ്വദേശിയെയും പോലീസ് പിടികൂടിയിരുന്നു.
ഇവരെ കസ്റ്റഡിയില് വാങ്ങി ചോദ്യം ചെയ്തപ്പോഴാണ് ലഹരിമരുന്ന് ശൃംഖലയിലെ പ്രധാനികളായ അദ്വൈതയെയും സിജാഹിനെയും കുറിച്ചുള്ള നിര്ണ്ണായക വിവരങ്ങള് ലഭിച്ചത്. വര്ഷങ്ങളായി കേരളത്തിന്റെ വിവിധ ഭാഗങ്ങളിലേക്ക് വന്തോതില് രാസലഹരി എത്തിക്കുന്ന സംഘത്തിലെ കണ്ണികളാണ് ഇരുവരുമെന്ന് പോലീസ് സ്ഥിരീകരിച്ചു. ബംഗളൂരുവില് പോലീസ് എത്തിയ വിവരം അറിഞ്ഞ പ്രതികള് രക്ഷപ്പെടാന് ശ്രമിച്ചെങ്കിലും തന്ത്രപരമായി ഇവരെ കീഴടക്കുകയായിരുന്നു. പ്രതികളെ ശാസ്താംകോട്ടയില് എത്തിച്ച് കൂടുതല് അന്വേഷണം നടത്താനാണ് പോലീസ് തീരുമാനം.
