കൊൽക്കത്ത: ബംഗാളിൽ ബിജെപിയുടെ കന്നി മുഖ്യമന്ത്രിയായി സുവേന്ദു അധികാരി സത്യപ്രതിജ്ഞ ചെയ്യുന്നതിന് മുന്നോടിയായി, പാർട്ടിയുടെ കരുത്തായ മുതിർന്ന പ്രവർത്തകൻ മഖൻലാൽ സർക്കാരിനെ ആദരിച്ച് പ്രധാനമന്ത്രി നരേന്ദ്ര മോദി. വെള്ളിയാഴ്ച നടന്ന ചടങ്ങിൽ വെച്ച് മഖൻലാൽ സർക്കാരിന്റെ പാദങ്ങൾ തൊട്ട് വണങ്ങിയ പ്രധാനമന്ത്രി അദ്ദേഹത്തിന്റെ അനുഗ്രഹം തേടി.
വേദിയിൽ വെച്ച് അദ്ദേഹത്തിന് ഷാൾ അണിയിച്ച ആദരിച്ച പ്രധാനമന്ത്രി, ഏറെ നേരം ഹൃദ്യമായി സംസാരിക്കുകയും ചെയ്തു. ബംഗാളിൽ ആദ്യമായി ബിജെപി സർക്കാർ അധികാരത്തിലേറുന്ന ചരിത്ര മുഹൂർത്തത്തിൽ പ്രധാനമന്ത്രി നടത്തിയ ഈ മാതൃകാപരമായ നീക്കം അണികൾക്കിടയിലും പൊതുജനങ്ങൾക്കിടയിലും വലിയ ശ്രദ്ധ നേടി.
ബംഗാളിലെ ബിജെപി പ്രവർത്തകർക്കിടയിലെ ഏറ്റവും മുതിർന്ന വ്യക്തിത്വമാണ് 98 വയസ്സുകാരനായ മഖൻലാൽ സർക്കാർ. സ്വതന്ത്ര ഇന്ത്യയിലെ ദേശീയ പ്രസ്ഥാനങ്ങളുമായി അടുത്ത ബന്ധമുള്ള അദ്ദേഹം പാർട്ടിയുടെ ആശയപരമായ അടിത്തറ രൂപപ്പെടുത്തുന്നതിൽ പ്രധാന പങ്കുവഹിച്ച വ്യക്തിയാണ്. 1952-ൽ കാശ്മീരിൽ ഇന്ത്യൻ ദേശീയ പതാക ഉയർത്താനുള്ള പോരാട്ടത്തിനിടെ ഭാരതീയ ജനസംഘം സ്ഥാപകൻ ശ്യാമപ്രസാദ് മുഖർജിക്കൊപ്പം മഖൻലാൽ സർക്കാർ അറസ്റ്റ് ചെയ്യപ്പെട്ടിട്ടുണ്ട്.
ബംഗാളിലെ ബിജെപിയുടെ ഈ ചരിത്ര വിജയ വേളയിൽ, പാർട്ടിയുടെ വേരുകൾ പടർത്താൻ കഠിനാധ്വാനം ചെയ്ത പഴയകാല പ്രവർത്തകർക്കുള്ള പ്രതീകാത്മകമായ ആദരവായാണ് പ്രധാനമന്ത്രി മഖൻലാൽ സർക്കാരിന്റെ പാദങ്ങൾ തൊട്ട് വണങ്ങിയത്.
