ലഖ്നൗ: 2027-ലെ നിയമസഭാ തിരഞ്ഞെടുപ്പിന് മുന്നോടിയായി ഉത്തര്പ്രദേശില് നിര്ണ്ണായക രാഷ്ട്രീയ നീക്കങ്ങളുമായി മുഖ്യമന്ത്രി യോഗി ആദിത്യനാഥ്. നാളെ വൈകുന്നേരത്തോടെ ഉത്തര്പ്രദേശ് മന്ത്രിസഭയില് വിപുലമായ മാറ്റങ്ങള് ഉണ്ടാകുമെന്നാണ് റിപ്പോര്ട്ടുകള് സൂചിപ്പിക്കുന്നു. സത്യപ്രതിജ്ഞാ ചടങ്ങിന് മുന്നോടിയായി മുഖ്യമന്ത്രി യോഗി ആദിത്യനാഥ് ഗവര്ണര് ആനന്ദി ബെന് പട്ടേലുമായി ലഖ്നൗവിലെ ലോക് ഭവനില് കൂടിക്കാഴ്ച നടത്തി. ആറ് പുതിയ മന്ത്രിമാര് നാളെ സത്യപ്രതിജ്ഞ ചെയ്യാനാണ് സാധ്യത.
നിലവിലെ മന്ത്രിമാരുടെ വകുപ്പുകളില് മാറ്റം വരുത്താനും സാധ്യതയുണ്ട്. 2024-ലെ ലോക്സഭാ തിരഞ്ഞെടുപ്പിലുണ്ടായ തിരിച്ചടികള് പരിഹരിക്കാനും വിവിധ ജാതി-പ്രാദേശിക വിഭാഗങ്ങളെ ഒപ്പം നിര്ത്താനുമാണ് ഈ വിപുലീകരണത്തിലൂടെ ബിജെപി ലക്ഷ്യമിടുന്നത്. മുന് യുപി ബിജെപി അധ്യക്ഷനും മൊറാദാബാദില് നിന്നുള്ള പ്രമുഖ ജാട്ട് (ഒബിസി) നേതാവും ഭൂപേന്ദ്ര ചൗധരി, റായ്ബറേലിയിലെ ഊഞ്ചാഹാറില് നിന്നുള്ള ബ്രാഹ്മണ നേതാവ് മനോജ് പാണ്ഡെ. സമാജ്വാദി പാര്ട്ടി വിട്ടാണ് ഇദ്ദേഹം ബിജെപിയുമായി അടുത്തത്.
കൗശാംബിയിലെ ചായല് മണ്ഡലത്തില് നിന്നുള്ള എംഎല്എയും ഒബിസി നേതാവുമായ പൂജ പാല്. ബിജ്നോറില് നിന്നുള്ള ഗുര്ജര് (ഒബിസി) വിഭാഗക്കാരനായ എംഎല്സിയായ അശോക് കടാരിയ. കൃഷ്ണ പാസ്വാന് (ഖാഗ), സുരേഷ് പാസ്വാന് (ജഗദീഷ്പൂര്): പാസ്വാന് സമുദായത്തില് നിന്നുള്ള ദളിത് പ്രതിനിധ്യം ഉറപ്പാക്കാന് ഇവരെയും പരിഗണിക്കുന്നു. നിലവില് 54 മന്ത്രിമാരാണ് യുപിയിലുള്ളത്. പരമാവധി 60 പേരെ വരെ മന്ത്രിസഭയില് ഉള്പ്പെടുത്താന് സാധിക്കും.
സ്വതന്ത്ര ചുമതലയുള്ള ഒരു സഹമന്ത്രിയെ ക്യാബിനറ്റ് പദവിയിലേക്ക് ഉയര്ത്താനും സാധ്യതയുണ്ട്. 2017-ല് അധികാരത്തിലെത്തിയ യോഗി സര്ക്കാര് 2022-ല് ചരിത്രം തിരുത്തിക്കൊണ്ടാണ് തുടര്ച്ചയായ രണ്ടാം തവണയും ഭരണത്തിലേറിയത്. 403 അംഗ നിയമസഭയില് ബിജെപിക്ക് മാത്രമായി 255 എംഎല്എമാരുണ്ട്. അപ്നാ ദള് (എസ്), നിഷാദ് പാര്ട്ടി തുടങ്ങിയ സഖ്യകക്ഷികളുടെ പിന്തുണയോടെ ശക്തമായ നിലയിലാണ് എന്ഡിഎ.
എങ്കിലും, വരാനിരിക്കുന്ന തിരഞ്ഞെടുപ്പില് അഖിലേഷ് യാദവിന്റെ നേതൃത്വത്തിലുള്ള സമാജ്വാദി പാര്ട്ടിയെ പ്രതിരോധിക്കാന് ശക്തമായ ഒരു സാമൂഹിക കൂട്ടുകെട്ട് കെട്ടിപ്പടുക്കുകയാണ് ഈ മന്ത്രിസഭാ പുനഃസംഘടനയിലൂടെ യോഗി ആദിത്യനാഥിന്റെ ലക്ഷ്യം.
