ന്യൂഡല്ഹി: ഇന്ത്യന് പ്രീമിയര് ലീഗ് (ഐപിഎല്) താരങ്ങളുടെ സുരക്ഷയും സ്വകാര്യതയും മുന്നിര്ത്തി കര്ശന നിയന്ത്രണങ്ങളുമായി ബിസിസിഐ. താരങ്ങളുടെ ഹോട്ടല് വാസം, സാമൂഹിക മാധ്യമങ്ങളിലെ ഇടപെടലുകള് എന്നിവയിലാണ് പ്രധാനമായും മാറ്റങ്ങള് കൊണ്ടുവരുന്നത്. അഴിമതി വിരുദ്ധ ചട്ടങ്ങള് ലംഘിക്കപ്പെടുന്നു എന്ന കണ്ടെത്തലിനെത്തുടര്ന്നാണ് ബോര്ഡിന്റെ ഈ അടിയന്തര നീക്കം.
പുതിയ ചട്ടപ്രകാരം, മുന്കൂട്ടി അനുമതി വാങ്ങാത്ത സന്ദര്ശകര്ക്ക് താരങ്ങളുടെ ഹോട്ടല് മുറികളിലേക്ക് പ്രവേശനം അനുവദിക്കില്ല. അടുത്തിടെ ഒരു പ്രമുഖ താരത്തിന്റെ മുറിയില് അര്ദ്ധരാത്രിയിലും സന്ദര്ശകരെ കണ്ടെത്തിയത് സുരക്ഷാ വീഴ്ചയായി ബോര്ഡ് കണക്കാക്കുന്നു. ഇത്തരം ഇടപെടലുകള് ഒത്തുകളി വിരുദ്ധ നിയമങ്ങളുടെ ലംഘനമാണെന്ന് ബിസിസിഐ ചൂണ്ടിക്കാട്ടുന്നു. ഡ്രസ്സിങ് റൂമുകള്, പരിശീലന കേന്ദ്രങ്ങള് എന്നിവിടങ്ങളിലും കര്ശനമായ പ്രവേശന നിയന്ത്രണം ഏര്പ്പെടുത്തിയിട്ടുണ്ട്.
ഹോട്ടലുകളിലെ നിയന്ത്രിത മേഖലകളില് വച്ച് റീല്സുകളോ വീഡിയോകളോ ചിത്രീകരിക്കുന്നതിന് താരങ്ങള്ക്ക് വിലക്കുണ്ടാകും. കണ്ടന്റ് ക്രിയേറ്റര്മാരെയും ഇന്ഫ്ലുവന്സര്മാരെയും ഉപയോഗിച്ച് ഹോട്ടല് മുറികളിലും സ്റ്റേഡിയത്തിനുള്ളിലും വീഡിയോകള് ചിത്രീകരിച്ച് സോഷ്യല് മീഡിയയില് പ്രചരിപ്പിക്കുന്നത് വര്ദ്ധിച്ച സാഹചര്യത്തിലാണ് ഈ നടപടി. സുരക്ഷാ ഉദ്യോഗസ്ഥരെ അറിയിക്കാതെ താരങ്ങള് പുറത്തുപോകരുതെന്നും നിര്ദ്ദേശമുണ്ട്.
ബിസിസിഐയുടെ പുതിയ നിര്ദ്ദേശങ്ങള് ഫ്രാഞ്ചൈസികള്ക്ക് ലഭിച്ചുകഴിഞ്ഞു. എന്നാല്, ഇത് പ്രായോഗികമായി നടപ്പിലാക്കുന്നതില് ടീം മാനേജ്മെന്റുകള്ക്ക് ആശങ്കയുണ്ട്. യുവതാരങ്ങള് സോഷ്യല് മീഡിയയില് അതീവ സജീവമായതിനാല് അവരെ നിരന്തരം നിരീക്ഷിക്കുന്നത് പ്രായോഗികമല്ല. മുതിര്ന്ന താരങ്ങളുടെ കാര്യത്തില് ഇത്തരമൊരു നിയന്ത്രണം കൊണ്ടുവരുന്നത് പ്രയാസകരമാകുമെന്നും ചില ടീം അധികൃതര് പ്രതികരിക്കുന്നു. താരങ്ങളുടെ സ്വകാര്യതയെ മാനിച്ചുകൊണ്ടുതന്നെ, സ്പോണ്സര്മാരുമായി ചേര്ന്നുള്ള പ്രചാരണ പരിപാടികള്ക്കും കണ്ടന്റ് ക്രിയേറ്റര്മാരുടെ ഇടപെടലുകള്ക്കും ഇനി ബിസിസിഐയുടെ പ്രത്യേക അനുമതി ആവശ്യമായി വരും.
