പുരുളിയ: പശ്ചിമ ബംഗാളിലെ പുരുളിയ ജില്ലയില് വിവാഹച്ചടങ്ങില് പങ്കെടുക്കാന് പോയ ബിജെപി നേതാവിനെ മരിച്ച നിലയില് കണ്ടെത്തി. വ്യാഴാഴ്ച രാത്രി വീട്ടില് നിന്നിറങ്ങിയ ഹബുലാല് ഗോപ് (45) എന്ന നേതാവിനെയാണ് രാവിലെ മരിച്ച നിലയില് കണ്ടെത്തിയത്. സംഭവത്തിന് പിന്നില് ആസൂത്രിതമായ കൊലപാതകമാണെന്ന ആരോപണം ഉയര്ന്നതോടെ സംസ്ഥാനത്ത് രാഷ്ട്രീയ സംഘര്ഷാവസ്ഥ ഉടലെടുത്തു. പുരുളിയ മഫാസില് പോലീസ് സ്റ്റേഷന് പരിധിയിലെ കനാലി ഗ്രാമത്തിന് സമീപമാണ് മൃതദേഹം കണ്ടെത്തിയത്. ബെല്ഡി ഗ്രാമവാസിയായ ഹബുലാല് ഗോപ് പ്രദേശത്തെ സജീവ ബിജെപി പ്രവര്ത്തകനായിരുന്നു.
പാര്ട്ടിയുടെ ‘ശക്തി കേന്ദ്ര പ്രമുഖ്’ ആയി അദ്ദേഹം പ്രവര്ത്തിച്ചു വരികയായിരുന്നുവെന്ന് പ്രാദേശിക ബിജെപി നേതൃത്വം അറിയിച്ചു. വ്യാഴാഴ്ച രാത്രി ഒരു വിവാഹച്ചടങ്ങില് പങ്കെടുക്കാനായി പോയതായിരുന്നു ഇദ്ദേഹം. എന്നാല് വെള്ളിയാഴ്ച രാവിലെ സംശയാസ്പദമായ സാഹചര്യത്തില് മൃതദേഹം നാട്ടുകാരുടെ ശ്രദ്ധയില്പ്പെടുകയായിരുന്നു. ഹബുലാല് ഗോപിന്റെ രാഷ്ട്രീയ പ്രവര്ത്തനങ്ങളിലുള്ള വൈരാഗ്യം മൂലം ആരോ അദ്ദേഹത്തെ ആസൂത്രിതമായി കൊലപ്പെടുത്തിയതാണെന്ന് കുടുംബാംഗങ്ങള് ആരോപിച്ചു. ‘അദ്ദേഹം ബിജെപിയുടെ സജീവ പ്രവര്ത്തകനായിരുന്നു.
ഇതൊരു ആസൂത്രിത കൊലപാതകമാണ്,’ ബന്ധുക്കള് പറഞ്ഞു. കുറ്റവാളികളെ ഉടന് അറസ്റ്റ് ചെയ്യണമെന്നും നിഷ്പക്ഷമായ അന്വേഷണം വേണമെന്നും അവര് ആവശ്യപ്പെട്ടു. നേതാവിന്റെ മരണവാര്ത്ത പുറത്തുവന്നതോടെ ബിജെപി പ്രവര്ത്തകര്ക്കിടയില് വന് പ്രതിഷേധം ഇരമ്പി. യുവമോര്ച്ച പ്രവര്ത്തകര് സ്ഥലത്തെത്തി കര്ശന നടപടി ആവശ്യപ്പെട്ടു. ഗ്രാമത്തില് പാര്ട്ടി പ്രവര്ത്തകര് തടിച്ചുകൂടിയത് പ്രദേശത്ത് സംഘര്ഷാവസ്ഥ സൃഷ്ടിച്ചിട്ടുണ്ട്. വിവരമറിഞ്ഞ് സ്ഥലത്തെത്തിയ പോലീസ് മൃതദേഹം പുരുളിയ ഗവണ്മെന്റ് മെഡിക്കല് കോളേജ് ആശുപത്രിയിലേക്ക് പോസ്റ്റ്മോര്ട്ടത്തിനായി മാറ്റി.
മരണകാരണം വ്യക്തമാകുന്നതിനായി പോസ്റ്റ്മോര്ട്ടം റിപ്പോര്ട്ടിനായി കാത്തിരിക്കുകയാണെന്ന് പോലീസ് അറിയിച്ചു. സംഭവത്തില് ഇതുവരെ ആരെയും അറസ്റ്റ് ചെയ്തിട്ടില്ല. പശ്ചിമ ബംഗാളില് രാഷ്ട്രീയ പ്രവര്ത്തകര്ക്ക് നേരെയുള്ള ആക്രമണങ്ങള് പതിവാകുന്ന സാഹചര്യത്തില്, ഈ സംഭവം രാഷ്ട്രീയ പോരിന് വീണ്ടും ആക്കം കൂട്ടിയിരിക്കുകയാണ്.
